Qirg‘iziston respublikasidagi xalq deputati Tazabek Ikromov ovoz berishga bormagan saylovchilarni qirg‘iz pulida 5 ming somdan (690 ming so‘m) jarimaga tortishni taklif qilmoqda. Xalq deputatining g‘oyasi Markaziy saylov komissiyasi tomonidan qo‘llab-quvvatlangan, biroq Vazirlar Mahkamasi bunga qarshi chiqdi va bu Konstitutsiyaga zid ekanligi ta’kidlangan.

Loyiha tashabbuskori Tazabek Ikromovning aytishicha, qonun loyihasining maqsad va vazifalari fuqarolarning saylov hamda referendumlarda o‘z vakolatlarini bevosita amalga oshirishni to‘liq ta’minlashdan iborat. Konstitutsiyaviy qonun loyihasida Qirg‘izistonda istiqomat qiluvchi barcha fuqarolar prezident va Jogorku Kenesh deputatlari saylovida uzrli sabablarga ko‘ra ishtirok etuvchi shaxslar bundan mustasno, ishtirok etishi shart degan norma kiritish taklif qilinmoqda.

Muhokama chog‘ida yana bir deputat Jamila Isaeva uzrli sabablarni aniqlash masalasini ko‘tarib, ularni qonun loyihasida to‘g‘ridan-to‘g‘ri ko‘rsatish zarurligini ta’kidladi. Shuningdek, u jarima solish va undirish tartibi, mexanizmlariga eʼtibor qaratdi.

Hukumatning ko‘pgina a’zolari va xalqaro tashkilot vakillari bu qonun loyihasi Qirg‘iziston Konstitutsiyasi va xalqaro shartnomalar me’yorlariga zid, saylovda ishtirok etish har bir fuqaroning huquqi bo‘lib, uni saylovda qatnashmagani uchun jarimaga tortish qonunga muvofiq kelmaydi degan xulosani berishgan.
Bu fikrni ilgari surgan deputatning so‘zlariga ko‘ra, xorijiy davlatlar tajribasiga nazar tashlash kerak. Yevropa, Avstraliya, Braziliya , Turkiyada esa uzrsiz sabablarsiz saylovlarga kelmagan fuqarolarni javobgarlikka tortish amaliyoti mavjud va bu saylovchilarning ishtirokini ta'minlaydi.

Deputat ovoz berishni e'tiborsiz qoldirganlik uchun ma'muriy javobgarlik to'g'risidagi norma kiritishni taklif qilmoqda. Agar fuqaro uzrli sababsiz saylovga kelmasa, undan 5 ming som jarima to‘lash talab etiladi. Biroq qonun loyihasi muallifi u yoki bu saylovchi nega o‘z fuqarolik burchini bajarmaganini qanday, kim tekshirishiga aniqlik kiritmagan.

• Jarima
• Prezident
• Qirg‘iziston
• saylov