2021-yilning 15-dekabridan beri “Lokomotiv” asosiy jamoasini bosh murabbiy sifatida boshqarib kelgan Denis Korostichenko klub rahbariyati qaroriga binoan jamoaning Superligada koʻrsatayotgan qoniqarsiz natijalari sabab isteʼfoga chiqarilgan. 

Shuningdek, murabbiylar shtabida ishlab kelgan Andrey Miklyayev ham klub tomonidan ishdan boʻshatilgan.

Qayd etilishicha, Denis Korostichenko bundan buyon “Lokomotiv” bolalar futbol maktabi tizimida faoliyat olib boradi.

Maʼlum boʻlishicha endilikda, “temiryoʻlchilar” bosh murabbiyi sifatida Oʻzbek va Osiyo futboli yulduzi Server Jeparov faoliyat olib boradi.

Osiyoning ikki karra (2008–2010) “Eng yaxshi futbolchisi” deb topilgan Server Jeparov bungacha klub sport direktori vazifasini bajarib kelayotgandi. Server Reshatovichga murabbiylar shtabida Mirko Yelichich yaqindan yordam beradi.

Maʼlumot oʻrnida, ayni payt “temiryoʻlchilar” Superliga 16-tur yakunlariga koʻra, 17 ochko bilan turnir jadvalida 10-oʻrinni egallab turishibdi.

• Futbol
• Lokomotiv
• O‘zbekiston
• Tayinlov