Sherzod Kudbiyev Soliq qo‘mitasi raisi lavozimidan ozod etilib, Urbanizatsiya va uy-joy bozorini barqaror rivojlantirish milliy qo‘mitasi raisi lavozimiga tayinlandi. Kadastr agentligi direktori sifatida ishlab kelgan Farrux Pulatov uning o‘rnini egalladi.

Shavkat Mirziyoyevning tegishli farmoni bilan Sherzod Davlyatovich Kudbiyev Soliq qo‘mitasi raisi lavozimidan ozod etildi. Prezident matbuot kotibi Sherzod Asadovning ma’lum qilishicha, u Urbanizatsiya va uy-joy bozorini barqaror rivojlantirish milliy qo‘mitasi raisi lavozimiga tayinlandi.

Kudbiyev bu lavozimda 2023-yil avgustidan buyon ishlab kelayotgandi. Ungacha u sakkiz oy iqtisodiyot va moliya vaziri lavozimida faoliyat yuritgan. 2020-yil may oyidan 2022-yil oxirigacha Davlat soliq qo‘mitasiga rahbarlik qilgan. Shuningdek, prezidentning davlat xizmati va hokimiyat vakillik organlari bilan hamkorlik qilish masalalari bo‘yicha maslahatchisi, bandlik va mehnat munosabatlari vaziri, Mirzo Ulug‘bek tumani hokimi va boshqa lavozimlarda ham ishlagan.

Farrux Jaxongirovich Pulatov esa Soliq qo‘mitasi raisi lavozimiga tayinlandi.

Shu munosabat bilan u Iqtisodiyot va moliya vazirligi huzuridagi Kadastr agentligi direktori lavozimidan ozod etildi. U 2022-yil mart oyidan buyon shu lavozimda edi.

• Farmon
• Prezident
• Soliq
• Tayinlov