BBCning xabar berishicha, AQSh prezidenti Donald Tramp Xitoy rahbari Si Szinpin bilan yaqin kunlarda bo‘lib o‘tadigan uchrashuvi chog‘ida Ukrainadagi urushni tugatish yo‘llarini muhokama qilishni rejalashtirayotganini ma’lum qildi.

“Biz Rossiyaga qarshi jiddiy sanksiyalar joriy etdik. O‘ylaymanki, bu sanksiyalar juda kuchli ta’sir ko‘rsatadi. Lekin men Xitoy ham bizga yordam berishini istardim”, — degan Osiyo davlatlari bo‘ylab safarga yo‘l olayotgan AQSh prezidenti Air Force One samolyotida jurnalistlar bilan muloqotda.

Jurnalistlar, shuningdek, Trampdan “Rossiyaga qarshi sanksiyalar Putin tomonidan keskin harakatlarga olib kelishidan qo‘rqmayapsizmi?”, deya so‘ragan.

“Men bunday deb o‘ylamayman. Putin bu sanksiyalar Rossiyaga katta ta’sir ko‘rsatmasligini aytdi. Men ushbu masalada uning haq emasligiga ishonaman. Ko‘ramiz, nima bo‘ladi. Menimcha, Putin ham Ukraina urushini tugatishni xohlaydi”, — degan Qo‘shma Shtatlar rahbari.

Trampning Osiyo bo‘ylab safari besh kun davom etadi. U Malayziya, Yaponiya va Janubiy Koreyaga tashrif buyuradi hamda yakshanba kuni Kuala-Lumpurda boshlanadigan Janubi-Sharqiy Osiyo davlatlari assotsiatsiyasi (ASEAN) sammitida ishtirok etadi.

• AQSh
• Rossiya
• Si Szinpin
• Tramp
• Ukraina
• Xitoy