O‘zbekistonda tergov hibsxonalarida ushlab turilgan va qamoqqa olingan shaxslarga bayram kunlarida yaqin qarindoshlari va boshqa shaxslardan kiyishga ruxsat etilgan kiyim-bosh va poyabzal olish huquqlarini berish, har oyda oziq-ovqat va eng zarur narsalarni sotib olish uchun ruxsat etilgan pul miqdorini oshirishga oid normalarni kiritish taklif etilyapti. Bu haqda kecha, 18 noyabr kuni Oliy Majlis Qonunchilik palatasining navbatdagi majlisida ko‘rib chiqilgan Oliy Majlisning Inson huquqlari bo‘yicha vakili (ombudsman)ning “Jinoyat ishini yuritish chog‘ida qamoqda saqlash to‘g‘risida”gi O‘zbekiston Respublikasi qonuniga qo‘shimchalar kiritish to‘g‘risida”gi qonunchilik taklifida so‘z boradi. Ichki ishlar vazirligi Jazoni ijro etish departamenti boshqarma boshlig‘i Bahrom Madiyorovning aytishicha, ushbu qonun loyihasini ishlab chiqishda ombudsman bilan birgalikda xalqaro tajriba o‘rganilgan.

“Hozirgi amaliyotda ham, agar uydagilari uni kiyim-boshini, poyabzalini, oziq-ovqati bilan birgalikda olib keladigan bo‘lsa, qabul qilamiz. Unda muammo yo‘q. Bu norma faqat rag‘batlantiruvchi norma sifatida e’tirof etilyapti. Ko‘pchilikda shunday holatlar bo‘ladi – uydagilari xabar topadi-da, uning kiyimini olib kelishga imkoniyati mavjud bo‘lmay qoladi. Kimdadir qandaydir sharoit bo‘lib qoladi-da, “oziq-ovqatini keyin beraman, lekin hozir kiyimini berib turing”, deydi. Shu mazmunda kelsa ham, biz bemalol uni olib qo‘yaveramiz. Hech qanday muammosi bo‘lmaydi. Ya’ni, buni qonuniy jihatdan huquqini ta’minlab qo‘yish maqsadida bu norma kiritilyapti”, – deydi Madiyorov.

Uning aytishicha, juda ko‘p jazo o‘tayotgan, ya’ni tergov hibsxonasida saqlanayotgan shaxslar uydagilari tomonidan berilgan pul mablag‘larini yetarli miqdorda emasligi bo‘yicha murojaat qiladi. Hozirda tergov hibsxonasida saqlanayotgan shaxslar IIV buyrug‘iga muvofiq har oyda eng kam ish haqining 50 foizigacha (635 ming 500 so‘m) oziq-ovqat va birinchi navbatdagi ehtiyoj mollariga sarflay oladi. Loyihada bu miqdorni 1 million 271 ming so‘mgacha oshirish taklif qilinmoqda.

“Fuqarolar uzoq joylardan kelib, “posilka”, banderol yoki yo‘qlov topshirib ketish holatlari juda ko‘payib ketyapti. Bitta misol aytadigan bo‘lsak, markaziy tergov hibsxonasida hozir 4000 dan ortiq shaxs saqlanayotgan bo‘lsa, kuniga 250-300 ta fuqaromiz kelib, ularga “peredacha”, banderol berib ketyapti. Ya’ni fuqarolarimizda ortiqcha ovoragarchilik paydo bo‘lyapti-da. Agar fuqaro uydan chiqmagan holda buni o‘zining hisob raqamiga pulini o‘tkazib qo‘yadigan bo‘lsa, saqlanayotgan shaxs shuni yaratilgan sharoitlarda o‘zining kerakli, zarur bo‘lgan mahsulotlarni xarid qilish imkoniyatiga ega bo‘ladi. Ya’ni uydagilarining ovoragarchiligining oldi olinadi”, – deydi IIV mas’uli.

Majlisda qonunchilik taklifi deputatlar tomonidan ma’qullangan va tegishli qaror qabul qilingan.

• IIV
• Jazo
• Qonun
• tergov