Bugun, 16-may kuni O‘zbekiston Respublikasi Prezidenti O‘zbekistonga tashrif bilan bo‘lib turgan Shanxay hamkorlik tashkiloti Bosh kotibi Chjan Minni qabul qildi. Bu haqda Prezident matbuot xizmati xabar berdi.

Qayd etilishicha, ShHT doirasida amaliy hamkorlikni yanada kengaytirish va mintaqaviy sheriklikni mustahkamlash, shuningdek, O‘zbekistonning Tashkilotga raisligi davridagi asosiy tadbirlarga tayyorgarlik ko‘rish masalalari ko‘rib chiqildi. Barqarorlik va xavfsizlik uchun xavf tug‘dirayotgan xatar va tahdidlarga qarshi kurashishda Tashkilot salohiyatini kuchaytirish, “Shanxay ruhi” prinsiplari asosida ko‘p tomonlama hamkorlikni chuqurlashtirish zarurligi ta’kidlandi.

Transport sohasida o‘zaro bog‘liqlik, “yashil” energetika, innovatsiyalar, raqamli iqtisodiyot, sanoat kooperatsiyasi borasidagi qo‘shma loyihalarni ilgari surishga alohida e’tibor qaratildi.

Shuningdek, uchrashuvda xalqaro kun tartibining dolzarb muammolariga ham to‘xtalib o‘tildi. Afg‘oniston masalasida SHHT rolini oshirish hamda ushbu mamlakatni infrutazilmaviy rivojlanish bo‘yicha mintaqaviy dasturlarga faol jalb qilish zarurligi qayd etildi.

• Prezident
• ShHT