Oliy Majlis Senati raisi o‘rinbosari Sodiq Safoyevning fikricha, ShHTning Samarqand sammiti O‘zbekistonning xalqaro miqyosdagi nufuzi va o‘rni ortib borayotganini ko‘rsatadi.

“Shanxay hamkorlik tashkiloti barqarorlikni ta’minlovchi kuch sifatida tan olingan. Kuzatilayotgan tahdidlar fonida aynan Samarqand sammitidan butun dunyo aholisi ko‘p narsa kutmoqda. Xalqlar bugun ro‘y berayotgan mojarolar, qurolli to‘qnashuvlar, mamlakatlarni ziddiyatlarni bartaraf etishga yordam berishiga umid qilishmoqda.

Darhaqiqat, dunyo o‘zgardi. Ammo oxirgi yillarda O‘zbekiston ham o‘zgardi. Bugungi Vatanimizni besh yil oldingisi bilan taqqoslab bo‘lmaydi. Mamlakatning mavqei ham, uning ta’sir kuchi ham ortib boryapti.

O‘zbekistonning mintaqaviy va global miqyosdagi muammolarni yechishga bo‘lgan intilishi ShHT doirasidagi tadbirlarda ham yaqqol namoyon bo‘lyapti. Ishtirokchi mamlakatlarni bir joyga to‘plab, o‘zaro ziddiyatlarni bartaraf etib, ularning boshini qovushtirish yuksak diplomatik mahoratni va mezbon davlatning obro‘si yuqorishi bo‘lishini talab etadi.

Hech shubhasiz, ShHT sammiti natijador bo‘ladi. U faqat uchrashuvlar, muhokamalardan emas, amaliy ishlarga erishiladi”, – deydi Safoyev.
Shuningdek, uning aytishicha, ShHT bu – mintaqaviy rivojlanish tashkiloti. Mintaqaning eng yirik davlatlarning bu tashkilotga kirishi ko‘zda tutilgan dasturning amalga oshishida ijobiy rol o‘ynashi mumkin.

“Eron – muhim va yirik davlat. Dunyoda bevosita chegaradosh davlatlar soni bo‘yicha ham eng katta mamlakat bu – Eron. U Markaziy Osiyoni Yaqin sharq, Janubiy Osiyo, Kavkaz, Yevropa bilan bog‘lovchi chorrahada joylashgan. Bu esa uning jo‘g‘rofiy joylashuvi qanchalik muhimligini ko‘rsatadi.

Eng asosiysi – Eron orqali dengiz portlariga chiqish imkoniyati biz uchun juda muhim. Chabahar dengiz portlari Markaziy Osiyoni jahon bozori bilan bog‘lashda muhim ahamiyat kasb etishi mumkin. Albatta, Eron bilan hamkorlik qilish SHHT uchun juda muhim”, –degan Sodiq Safoyev.

• Safoyev
• Samarqand
• ShHT