Ijtimoiy tarmoqlar orqali Sirdaryoda “Jiguli” haydovchisi itini o‘ldirib, kallasini mashinaga yopishtirib harakatlangani aks etgan tasvirlar tarqaldi. Holat yuzasidan viloyat IIB axborot xizmati izoh berdi.

Qayd etilishicha, IIB masʼul xodimlari tomonidan avtomashina haydovchisining shaxsi aniqlanib, holatga oydinlik kiritilgan.

Taʼkidlanishicha, avtomobil haydovchisi Guliston shahrida yashovchi 1988-yilda tug‘ilgan fuqaro A.A. joriy yilning 28 noyabr kuni o‘ziga qarashli fermadan yashash xonadoniga olib ketish maqsadida itni avtomashina yukxonasiga joylagan. Olib ketilayotgan vaqtda it avtomashina yoqilg‘i quyish baki qopqog‘idan boshini chiqarib olgan va ushbu holat ijtimoiy tarmoq foydalanuvchilari tomonidan suratga olinib noto‘g‘ri talqin qilingan.

“Holat yuzasidan masʼul xodimlar tomonidan haydovchiga profilaktik tushuntirishlar berilib, xavfsizlik qoidalariga amal qilish yuzasidan ogohlantirildi”, – deyiladi xabarda.

• IIB
• Jamoat xavfsizligi
• Sirdaryo