Soliq qo‘mitasi 2026-yil aprel oyida amalga oshirilgan xaridlar bo‘yicha keshbek to‘lovlarining asosiy qismini tasdiqladi. Rasmiy ma’lumotlarga ko‘ra, 6,5 milliondan ortiq fuqaro uchun jami 143,6 milliard so‘m keshbek mablag‘ini to‘lashga ruxsat berilgan.

 Fuqarolar tasdiqlangan mablag‘larni «Soliq» mobil ilovasi orqali o‘z bank kartalariga o‘tkazib olishlari mumkin. Buning uchun ilovada Face ID orqali shaxsni tasdiqlash talab etiladi.

Soliq qo‘mitasi barcha keshbek mablag‘lari bir vaqtning o‘zida tasdiqlanmasligini ma’lum qildi. Qolgan mablag‘lar tadbirkorlarning soliq hisobotlari topshirilishi, xatolar bartaraf etilishi va qarzdorliklar yopilishiga qarab bosqichma-bosqich tasdiqlanadi.

Amaldagi tartibga ko‘ra, fuqarolar bir oyda BHMning 60 baravaridan oshmagan xaridlar uchun keshbek olishi mumkin. Hozirgi limit 24 million 720 ming so‘mni tashkil etib, eng ko‘p keshbek miqdori 247 ming 200 so‘mni tashkil qiladi.