Kuni kecha Buxoro va Navoiy viloyati oʻrtasidagi Qizilqum choʻli hududida tashkil etilgan “Stixiya” — elektron musiqa festivali oʻz yakuniga yetdi. Unda yurtimiz va xorijdan tashrif buyurgan 2 mingdan ortiq elektron musiqa ishqibozlari va ekologiyaga eʼtiborsiz boʻlmagan insonlar ishtirok etishdi.

Festivalni tashkil etishdan asosiy maqsad mamlakatimizdagi ekologik muammolarga jamoatchilik eʼtiborini qaratish, yoshlarni musiqaga boʻlgan qiziqishlarini oshirish, shu bilan birga, turistlar oqimini kengaytirishdir.

“Stixiya” elektron musiqa festivali yurtimizda 2017-yildan buyon turizmni rivojlantirish, Oʻzbekistonni butun dunyoga tanitish, ekologik muammolarga eʼtiborni oshirish maqsadida oʻtkazib kelinadi.

Festivalda eski kiyimlarni qayta ishlash natijasida tayyorlangan liboslar uchun eko rastalar tashkil etildi. Bundan tashqari, mavhumlik ichra oʻtirgan “Kosmonavt”, chiqindilardan qayta yigʻilgan “daraxt” va “Nano layt gullari bogʻi” festivalning oʻziga xos ramziga aylandi.

Eslatib oʻtamiz, 3 kun davom etgan festival Ekologiya va atrof-muhitni muhofaza qilish va iqlim oʻzgarishi vazirligi, Navoiy va Buxoro viloyatlari hokimliklari koʻmagida tashkillashtirildi. 2024-yilda “Stixiya” musiqa festivalini Moʻynoqda oʻtkazish rejalashtirilgan.

• Festival
• Lifestyle