Afg‘oniston va O‘zbekiston o‘rtasidagi chegara suv toshqini tufayli yuvilib ketgan. Bu haqda Afg‘oniston energetika va suv resurslari vaziri vazifasini bajaruvchi Abdulatif Mansur ma’lumot berdi.

Keltirilishicha, Afg‘oniston bilan Tojikiston, O‘zbekiston va Turkmaniston o‘rtasidagi chegaralarni belgilash yangi strategiya bo‘yicha amalga oshiriladi. Islom Amirligi rahbarining ko‘rsatmalariga asoslangan bu reja Ichki ishlar, Mudofaa, Razvedka Bosh boshqarmasi va Tashqi ishlar vazirligi bilan hamkorlikda bajariladi.

“Tojikiston, O‘zbekiston va Turkmaniston bilan chegaralarimiz suv toshqinlari tufayli yuvilib ketdi. Muhimi shundaki, biz o‘tmish chegaralarini belgilash bo‘yicha muhim ishlarni amalga oshirmoqdamiz”, – deydi Abdulatif Mansur.

Shuningdek, Mansur Afg‘onistonning suv boshqaruvi va energiya ishlab chiqarishga bo‘lgan ehtiyojini ta’kidlab, bu borada yirik to‘g‘onlarni qurish, suv, shamol va quyosh resurslaridan foydalanish orqali o‘zini o‘zi ta’minlashga erishishni maqsad qilganini aytgan.

Shu bilan birga, suv resurslarini boshqarish qo‘shni davlatlarga zarar keltirmasligi ta’kidlangan.

• Afg‘oniston
• Chegara