Britaniyalik aktyor, “Titanik” va boshqa mashhur filmlardagi rollari bilan mashhurlikka erishgan ijodkor Devid Uorner 80 yoshida saraton kasalligidan vafot etdi. Bu haqda aktyorning oila aʼzolari maʼlum qilganlar.

U oʻzining soʻnggi kunlarini professional aktyorlar va teatr mutaxassislariga gʻamxoʻrlik qiladigan “Denvill Hall” qariyalar uyida oʻtkazgani aytib oʻtilgan.

“Aktyor Devid Uorner “Denvill Hall”da saraton kasalligidan vafot etgani haqidagi xabarni chuqur qaygʻu bilan eʼlon qilamiz. Oxirgi 18 oy davomida u oʻziga qoʻyilgan tashxisni xayrixohlik va qadr-qimmat bilan qabul qildi”, – deydi Uornerlar oilasi.

Maʼlumot uchun, Uorner ijodiy faoliyati davomida 200 dan ortiq filmlarda rollar ijro etgan. “Omen”, “Taxt”, “Titanik”, “Yoʻqotilgan dunyo”, “Maymunlar sayyorasi” filmlari orqali tomoshabinlar mehrini qozongan.

• Kino
• Titanik
• aktyor