Bir muddat avval ijtimoiy tarmoqlarda “xonadonda noqonuniy sher bolasi saqlanayotgani maʼlum bo‘ldi” sarlavhali maqola tarqalgan va unda 2004-yilda tug‘ilgan fuqaro Sh.A. Afrika sherining bolasini o‘z xonadonida noqonuniy saqlab kelayotganligi bois olib qo‘yilgan hamda maxsus pitomnikka joylashtirilgani haqida xabarlar tarqalgan edi.

Maʼlum bo‘lishicha, ushbu sher bolasi mutasaddilar eʼtiboriga noqonuniy saqlanayotgani uchun emas, balki Toshkent tumani Hasanboy hududi, “Bahor” MFY Navro‘z ko‘chasida 3 yoshli bolaga, bolaning oila aʼzolariga hamla qilgani uchun olib qo‘yilgan.

Gap shundaki, 7-aprel kuni soat 17:30 lar atrofida ona vabola sut olishga do‘konga chiqayotganida sher bolasi ularga hamla qilib tashlangan.

Onaning guvohlik berishicha, sher orqa tomondan kelib bolaning boshidan tishlagan va orqaga tortib ketgan. Ona o‘z vaqtida sherga tashlanib uni bosib olgan va bolasidan ajratishga erishgan. Ammo bolaning bosh qismiga sherning tishlaridan yetgan jarohatlar qolgan.

Hozirda bolakay Toshkent shahridagi Mirzo Ulug‘bek tumani 2-son Bolalar jarrohlik klinikasida davolanyapti.

Shifokor ayni paytda xavf ortda qolgani va bolaning ahvoli yaxshi ekanini bildirmoqda.

• Ekologiya
• Hayvon
• Sher