Bojxona qo‘mitasining Kontrabandaga qarshi kurashish boshqarmasi xodimlari DXXning Qoraqalpog‘iston Respublikasi boshqarmasi vakillari bilan hamkorlikda giyohvandlik vositalarining savdosiga qarshi Toshkent viloyatining Yangiyo‘l tumanida tezkor-qidiruv tadbiri o‘tkazishdi.

Tadbir davomida oldindan kuzatuvga olingan fuqaro xaridorga 1 kg 12 gr “gashish” giyohvandlik moddasini 13 000 AQSh dollariga sotishni kelishib oladi. Keyin esa Yangiyo‘l tumanidagi mehmonxonada kelishilgan mablag‘dan 1000 AQSh dollarini olayotgan vaqtida qo‘lga olingan.

Ko‘zdan kechiruv jarayonida esa fuqarodan 1 kg.dan ziyod “gashish” narkotik moddasi ashyoviy dalil sifatida olib qo‘yilgan.

Shuningdek, Bojxona qo‘mitasining Kontrabandaga qarshi kurashish boshqarmasi hamda Toshkent viloyati bojxona boshqarmasi tezkor xodimlari tomonidan DXX vakillari bilan hamkorlikda Ohangaron shahrida ham tezkor tadbir o‘tkazildi.

Ushbu jarayonda xodimlar tomonidan Spark rusumli avtomashina belgilangan tartibda to‘xtatilib, xolislar ishtirokida ko‘zdan kechirilganida uning yuk xonasidagi ovoz kuchaytirgich ichidan 841 dona “Zardeks” va 1042 dona “Regapen” nomli kuchli ta’sir qiluvchi dori vositalari topilgan.

O‘rganishlar davomida ushbu moddalar avtomashinada yo‘lovchi sifatida harakatlanib ketayotgan 3 nafar fuqaroga tegishli ekanligi, ular bu dorilarni Ohangaron shahriga sotish maqsadida olib ketishayotganligi ma’lum bo‘ladi.

Hozirda har ikkala holat yuzasidan bojxona organlari tomonidan jinoyat ishlari qo‘zg‘atilgan.

• DXX
• Jinoyat
• Ohangaron
• Toshkent viloyati