Toshkentda uzoq muddatga nohaq qamalib, so‘ng oqlangan fuqaro 1 milliard so‘m ma’naviy zarar talab qildi. Bu haqda Oliy sud matbuot kotibi Aziz Obidov xabar qildi.

Ma’lum qilinishicha, 42 yoshli “Sadaf” MChJ rahbari, tadbirkor Dilshod Mingboyev 2011-yilda Jinoyat kodeksining 182-moddasi, ya’ni bojxona to‘g‘risidagi qonunchilikni buzishda ayblanib, 8 yilga ozodlikdan mahrum qilingan.

U jazo muddatining 5 yilini o‘tab bo‘lganidan keyin, Oliy sudning ajrimi bilan nohaq qamalgani ma’lum bo‘lgan va ozodlikka chiqarilgan. Tadbirkor fuqarolik sudiga murojaat qilib, 1 milliard so‘m ma’naviy zarar to‘lab berilishini so‘ragan.

“Shu 5 yil ichida qancha qiyinchiliklar ko‘rdik, onam qancha qiynaldi, shuning orqasidan kasal orttirdi. Umr yo‘ldoshim, onam, men, qancha qiyinchiliklarni boshdan o‘tkazdik”, – degan u.

Uchtepa tuman sudida ko‘rib chiqilgan ishda Toshkent viloyati hokimligi huzuridagi jismoniy va yuridik shaxslarga yetkazilgan mulkiy zararlarni kompensatsiya qilish bo‘yicha hududiy maqsadli jamg‘armadan da’vogar foydasiga 300 million so‘m undirilishi haqida qaror chiqarilgan.

• Sud
• Toshkent