Qoraqalpog‘iston Respublikasidagi aholi punktlarining markazlashgan ichimlik suv ta’minoti tizimlarini kompleks rivojlantirish maqsadida 2,2 trillion so‘m mablag‘ yo‘naltiriladi. Bu haqda prezidentning 21-fevraldagi qarorida belgilandi.

“Qoraqalpog‘iston Respublikasini 2026 yilda ijtimoiy-iqtisodiy rivojlantirish va kelgusi yillar uchun mo‘ljallangan dasturlarni tasdiqlash to‘g‘risida”gi qarorga muvofiq, bu pullar xalqaro moliya institutlari, davlat byudjeti, mahalliy byudjetlar va homiylik mablag‘lari hisobidan jalb etiladi.

Shundan:

1,8 trln so‘m — xalqaro moliya institutlari;

299,1 mlrd so‘m — respublika byudjeti;

21,4 mlrd so‘m — mahalliy byudjet va uning qo‘shimcha manbalari;

22,9 mlrd so‘m — suv ta’minoti tashkilotlari mablag‘lari va homiylik xayriyalari bo‘lib, mablag‘lar 2026—2030-yillar davomida ajratiladi. 

Bu mablag‘lar hisobiga 1 719 kilometr tarmoq tortish, 56 dona quduq qazish va chuchuklashtiruvchi uskuna o‘rnatish, 36 dona suv inshootlarini qurish rejalashtirilgan. Buning natijasida Qoraqalpog‘istonda 2030-yilda markazlashgan ichimlik suvi ta’minoti 83,5 foizga yetkazilishi maqsad qilingan.

Bundan tashqari, Iqtisodiyot va moliya vazirligi va Osiyo taraqqiyot banki o‘rtasida erishilgan kelishuvlar doirasida Qoraqalpog‘iston Respublikasini rivojlantirish dasturini 2027-yildan boshlab moliyalash tizimi bo‘yicha jalb etiladigan 200 million dollar hisobiga amalga oshiriladigan loyihalar tasdiqlangan.

Jumladan, bu pullar hisobidan Amudaryo tumanida 6 ta mahalla fuqarolar yig‘iniga 107,1 kilometr ichimlik suvi tarmog‘ini yangidan quriladi, 1 ta nasos stansiyani hamda tuman markazidagi mavjud lokal suv tozalash inshooti rekonstruksiya qilinadi. Taxiatosh tumanining 2 ta mahalla fuqarolar yig‘iniga 89,9 kilometr ichimlik suv tarmog‘i hamda 3 ta suv taqsimlash inshootini qurish, rekonstruksiya qilishga mablag‘ ajratiladi.

Ellikqal’a tumani markazi Bo‘ston shahrida 35,7 kilometr markazlashgan kanalizatsiya tizimi hamda 5 ta oqova suv tozalash inshooti quriladi. Beruniy tumani markazida 35,7 kilometr markazlashgan kanalizatsiya tizimini hamda 4 ta oqova suv tozalash inshootlari yangidan quriladi.

Qoraqalpog‘istonda markazlashgan ichimlik suv ta’minotini yaxshilash uchun 2,2 trillion so‘m yo‘naltirilishi 20-fevral kuni Shavkat Mirziyoyev raisligida o‘tkazilgan yig‘ilishda ma’lum qilingandi. Prezident yana bir qator vazifalarni belgilab, unga erishish uchun barcha imkoniyat va resurslarni to‘liq ishga solishni topshirgandi. 

• Ichimlik suvi
• Prezident
• Qaror
• Qoraqalpog‘iston