Eron Islom Respublikasining halok bo‘lgan oliy rahnamosi Oyatulloh Ali Xomanaiyning o‘g‘li — Mujtabo Xomanaiy mamlakatning yangi rahbari etib saylandi. Bu haqda Germaniyaning Deutsche Welle (DW) nashri Eron hukumati tarkibidagi o‘z manbalariga tayanib xabar berdi.

DW manbalariga ko‘ra, Mujtabo Xomanaiyni saylash to‘g‘risidagi qaror 88 nafar nufuzli shia ulamolaridan iborat kengash tomonidan qabul qilingan. Ta’kidlanishicha, ushbu tayinlov Islom inqilobi muhofizlari korpusi (IIMK)ning bevosita bosimi ostida amalga oshirilgan.

Hozircha Eron rasmiylari va davlat OAV ushbu ma’lumotni rasman tasdiqlamagan. Ayni paytda, mamlakatni vaqtincha Mas’ud Pezeshkiyon, sud hokimiyati rahbari G‘ulom Husayn Muhsiniy-Ejey va vasiylik kengashi a’zosi Oyatulloh Alirizo Araafiydan iborat uch kishilik kengash boshqarmoqda.

Eron qonunchiligiga ko‘ra, mamlakatning diniy rahbari umrbod muddatga “Ekspertlar kengashi” tomonidan tayinlanadi. Islom huquqi bo‘yicha 88 nafar mutaxassisdan iborat ushbu organ har sakkiz yilda bir marta fuqarolar tomonidan saylanadi. Oxirgi saylovlar 2024-yilda bo‘lib o‘tgandi.

Xomanaiyning o‘g‘li Mujtabo ham ayrim guruhlar tomonidan ehtimoliy voris sifatida tilga olingan bo‘lsa-da, Xomanaiy o‘zi oliy rahnamo lavozimi meros tariqasida o‘tishini istamasligini bildirgan.

• Eron
• Rahbarlik
• Tayinlov