AQSh prezidenti Donald Tramp Eron bilan bog‘liq harbiy operatsiya yaqin orada yakunlanishi mumkinligini ma’lum qildi.

U jurnalistlarga bergan bayonotida mojaro tez rivojlanayotganini ta’kidlab, “Biz istagan natijaga erishishimiz mumkin. Bu tez orada tugashi kerak”, dedi.

Shuningdek, Tramp Erondagi harbiy kampaniyani majburiy qadam sifatida baholab, uni “kichik safar” deb atadi. Uning so‘zlariga ko‘ra, AQSh Eronning yadroviy qurolga ega bo‘lishiga yo‘l qo‘ymaslik uchun bu harakatlarga majbur bo‘lgan.

Avvalroq, 12-aprel kuni Islamabad shahrida AQSh va Eron o‘rtasida muzokaralar o‘tkazilgan. Tomonlar qator masalalarda kelishuvga erishgan bo‘lsa-da, yadroviy dastur va Hormo‘z bo‘g‘ozi orqali kema qatnovi masalalari ochiq qolgan.

AQSh tomoni yaqin kunlarda yangi muzokaralar bosqichi boshlanishi mumkinligini bildirgan.