So‘nggi paytlarda COVID-19’ning “Sikada” (BA.3.2) shtammi haqida xabarlar tarqalmoqda. Jahon sog‘liqni saqlash tashkiloti ma’lumotiga ko‘ra, u 20 dan ortiq davlatda aniqlangan, biroq hozircha jiddiy xavf tug‘dirayotgani tasdiqlanmagan.

Mutaxassislarning ta’kidlashicha, ushbu shtamm “Omikron”ga o‘xshash yengil simptomlar — burun bitishi, yo‘tal, tomoq og‘rig‘i va ba’zida hid hamda ta’m yo‘qolishi bilan kechadi. Ko‘proq bolalarda uchrayotgani qayd etilmoqda, bu esa kattalarda shakllangan immunitet bilan izohlanadi.

Shu bilan birga, surunkali kasalligi borlar, yoshi katta va immuniteti past shaxslar ehtiyot choralariga amal qilishi zarur.
O‘zbekistonda epidemiologik vaziyat barqaror bo‘lib qolmoqda. SSV “Sikada” shtammi keng ko‘lamli epidemiya keltirib chiqarishi ehtimoli past ekanini ta’kidlab, ortiqcha xavotirga o‘rin yo‘qligini bildirgan.