Buxoroda O‘zbekiston Respublikasi transport vazirligi vakillarining Turkiya Respublikasi transport va infratuzilma vazirligi delegatsiyasi bilan ishchi uchrashuvi bo‘lib o‘tdi. Bu haqda Transport vazirligi xabar berdi.

Uchrashuv davomida tomonlar yo‘lovchi va yuk tashish sohasida ikki tomonlama hamkorlikni rivojlantirish, shuningdek, Turkiya tajribasi asosida O‘zbekistonda avtovokzal va yo‘lovchi markazlarini tashkil etish va modernizatsiya qilish istiqbollarini muhokama qildilar.

Xususan, Turkiyaning “aqlli transport tizimi”ni joriy etish va yo‘lovchi tashish sohasida transport infratuzilmasini rivojlantirish bo‘yicha tajribasini o‘rganish bo‘yicha kelishuvga erishildi.

 Shuningdek, uchrashuv davomida xalqaro yuk tashish jarayonida milliy tashuvchilar uchun qulayliklar yaratish maqsadida sohada raqamlashtirish jarayonlarini chuqurlashtirish bilan bog‘liq jihatlar ko‘rib chiqildi.

Hozirgi vaqtda “ikki tomonlama” va “tranzit” tashish uchun ruxsatnomalar elektron shaklda (E-permit) rasmiylashtiriladi. Tomonlar yaqin kelajakda ruxsatnomalarni E-permit tizimiga o‘tkazish jarayonini yakunlashlarini va tizimni sinov rejimida ishga tushirishlarini ta’kidladilar.

• O‘zbekiston
• Transport
• Turkiya