Turkmanistonda qo‘l ushlaganlar hibsga olindi, Prezident almashganidan keyin hokimiyat fuqarolarning tashqi ko‘rinishi va xatti-harakati bilan jiddiy shug‘ullanmoqda.

Turkmanistonning Maryam shahrida o‘nlab juftliklar jamoat joylarida qo‘l ushlashib yurgani uchun qo‘lga olindi. Bu haqda “Meduza” nashri xabar berdi.
 
Qayd etilishicha, polisiya xodimlari ularni “an’anaviy ijtimoiy me’yorlar”ni buzganlikda ayblagan. Hibsga olinganlar kelajakda o‘z his-tuyg‘ularini oshkora ko‘rsatmaslik va’dalariga imzo chekkanlari uchun qo‘yib yuborilgan. 
 
Ta’kidlanishicha, Turkmanistonda qo‘l ushlashish rasman taqiqlanmagan. Serdar Berdimuhamedov hokimiyatga kelganidan so‘ng mamkakatda aholi, ayniqsa, ayollarning xulq-atvori va tashqi ko‘rinishi ustidan nazorat kuchaytirilgan. Aprel oyidan boshlab ko‘krak va lab kattalashtirish yoki tatuirovka kabi kosmetik operasiyalarga taqiq joriy qilingan. 

Xabarlarga ko‘ra, davlat korxonalari xodimlari ishdan bo‘shatish tahdidi ostida kosmetikani rad etish to‘g‘risida tilxat yozishga majbur bo‘lgan. 

Avvalroq, rasmiylar ayollarga avtomobilning oldingi o‘rindig‘iga o‘tirishni taqiqlagan. Haydovchilarga ham endilikda qarindoshlari bo‘lmagan ayollarni olib yurishiga ruxsat berilmaydi: yo‘l harakati polisiyasi ayollar bo‘lgan joyda mashinalarni to‘xtatib, haydovchi bilan qarindoshlik aloqalarini isbotlashni talab qila boshlagan.

Hukumatga yaqin manbalarga ko‘ra, rasmiylar ayollarning xorijga chiqishini taqiqlash masalasini ham ko‘rib chiqmoqda. Endilikda ular xorijda davolanishga muhtoj bo‘lgan taqdirdagina Turkmanistonni tark etishlari mumkin bo‘ladi.

Turkmanistonda ayollarning tashqi ko‘rinishiga nisbatan qattiq cheklovlar avvalroq, Gurbanguli Berdimuhamedov prezidentlik davrida vaqti-vaqti bilan e’lon qilingan. Shu bilan birga, odatda, ularning bajarilishi ustidan qat’iy nazorat bo‘lmagan.

• Turkmaniston