Shavkat Mirziyoyev IHT sammitida soʻzlagan nutqida umumiy saʼy harakatlarni birlashtirish zarur boʻlgan bir nechta yoʻnalishlarni belgiladi.

“Bugungi kunda barchamiz global va mintaqaviy vaziyatning tobora murakkablashib borayotganiga guvoh boʻlib turibmiz.

Davom etayotgan pandemiya taʼsirida jahon iqtisodiyoti rivojida qanday tendensiyalar kuzatiladi, xalqaro hamjamiyat yana qanday yangi xavf-xatarlarga duch keladi, degan savollarga hamon aniq javob yoʻq.

Bunday oʻzgaruvchan sharoitda quyidagi ustuvor yoʻnalishlar boʻyicha umumiy saʼy-harakatlarimizni birlashtirish zarur, deb hisoblaymiz.

“Birinchi yoʻnalish” – 500 milliondan ortiq aholi yashaydigan, ulkan bozorga ega boʻlgan mamlakatlarimizning savdo va investitsiya sohalaridagi katta imkoniyatlaridan toʻliq foydalanish zarur.

Qabul qilingan “Iqtisodiy hamkorlik tashkiloti istiqbollari – 2025” konseptual dasturi asosida mamlakatlarimiz oʻrtasida savdo-iqtisodiy va investitsiya aloqalarini yanada kengaytirish va eng muhimi, amaliy natijadorlikka erishish maqsadga muvofiqdir.

“Ikkinchi yoʻnalish” – mintaqamizdagi mavjud va yangi transport yoʻlaklaridan unumli foydalanish. Bu borada:

- mintaqalararo tranzit xablarini tashkil etish;

- zamonaviy transport va yoʻl infratuzilmalarini rivojlantirish;

- transport va tranzit tariflarini optimallashtirish hamda qoʻshimcha chegirmalarni taqdim etish;

- xalqaro yuk va yoʻlovchi tashish shartlarini yengillashtirish;

- transport sohasini raqamlashtirish masalalariga aniq yechimlar topishimiz zarur.

Bu rejalarni roʻyobga chiqarish uchun mamlakatlarimizning transport-kommunikasiya aloqalarini rivojlantirish va tranzit salohiyatini kengaytirishga qaratilgan mintaqaviy strategiyani ishlab chiqish maqsadga muvofiqdir”.

“Uchinchi yoʻnalish” – “yashil taraqqiyot”ga erishish uchun amaliy saʼy-harakatlarimizni safarbar etishimiz darkor.

Ekologik muammolar va iqlim oʻzgarishi keskin tus olayotgan hozirgi davrda:

- davlatlarimizda toʻplangan va xorijiy ilgʻor tajribadan samarali foydalanish;

- “yashil iqtisodiyot”ni birgalikda faol rivojlantirish;

- sanoat tarmoqlariga resurstejamkor texnologiyalarni keng tatbiq etish;

- uglerod neytralligiga erishish kun tartibimizdagi eng dolzarb vazifalardan biridir.

Buning uchun xalqaro ekolog olimlar va ekspertlar ishtirokida yuqori darajadagi (ekologiya vazirlari) doimiy Muloqot kengashini tuzishni taklif etamiz”.

“Toʻrtinchi yoʻnalish” – sayyohlik almashuvlarini qayta tiklash masalasidir.

Buxoro shahrida 2022 yili boʻlib oʻtadigan turizm vazirlarining navbatdagi uchrashuvida pandemiyadan keyingi davrda Xavfsiz sayyohlikni rivojlantirish umummintaqaviy Dasturini qabul qilish tashabbusini bildirmoqchiman.

Shu asosda “ziyorat turizmi” va boshqa qoʻshma sayyohlik mahsulotlarini ishlab chiqish, aviaqatnovlar geografiyasini kengaytirish, turizm infratuzilmasini rivojlantirishga jiddiy eʼtibor qaratilgan boʻlar edi.”, - dedi Shavkat Mirziyoyev.

• Mirziyoyev
• Prezident
• Turkmaniston