Yakshanba kuni Falastinning XAMAS guruhi so‘nggi oylarda birinchi marta Isroil markazidagi Tel-Aviv hududiga raketa hujumini uyushtirdi. Keyinroq Isroil armiyasi Rafahdagi obyektga zarba berdi.

G‘azoning XAMAS nazoratidagi Sog‘liqni saqlash vazirligi dushanba kuni kechqurun Rafahga berilgan zarba oqibatida kamida 35 kishi halok bo‘lganini va o‘nlab odamlarning yaralanganini maʼlum qildi.

Isroil mudofaa kuchlari shahardagi XAMAS lageriga havo hujumi uyushtirganini tan oldi. Hamda tinch aholi vakillarining jarohatlangani haqidagi xabarlarni tasdiqladi.

Isroil maxfiy razvedkasi: “Zarba xalqaro qonunlarga muvofiq, aniq o‘q-dorilardan foydalangan holda va XAMAS hududni ekspluatatsiya qilayotganini ko‘rsatuvchi aniq razvedka maʼlumotlariga asoslangan holda qonuniy nishonlarga qarshi amalga oshirilganini”, maʼlum qilgan.

Avvalroq Rafahdan Tel-Avivga kamida sakkizta raketa uchirilgan, bir qancha raketa tutib olingan, deya xabar berdi Isroil harbiylari.

Hujum Xalqaro jinoiy sud bosh prokurori Karim Ahmad Xon Isroil bosh vaziri Benyamin Netanyaxu va mudofaa vaziri Yoav Gallantni hibsga olish uchun order so‘ragan hamda Yevropaning uchta davlati Falastin hududlarini suveren davlat sifatida tan olish niyatini eʼlon qilgan kundan sal o‘tib sodir bo‘ldi.

BMT sudining hujumni to‘xtatish talabiga qaramay, Isroil Rafahga yangi zarbalar berdi.

XAMASning hujum haqidagi hisobotiga qo‘shilgan suratlarda raketalarning bir qismi sharqiy Rafah shahridan, 18 kundan beri Isroil harbiylari nazorati ostida bo‘lgan chegara punktiga juda yaqin joyda otilgani ko‘rsatilgan. Isroillik qurbonlar bo‘lgani haqida maʼlumotlar yo‘q.

• Isroil