“Xitoy-Qirg‘iziston-O‘zbekiston” temiryo‘li qurilishi 2024-yil oktyabr oyida boshlanishi rejalashtirilgan. Bu haqda Qirg‘iz temir yo‘li kapital qurilish boshqarmasi boshlig‘i Risqulbek Jumaboyev ma’lum qildi.

U amalga oshirilayotgan xalqaro loyiha, shuningdek, “Baliqchi — Qo‘chqor — Qora-Keche — Makmal” temiryo‘li mamlakatning asosiy transport arteriyalariga aylanishini ta’kidladi.

“Xitoy-Qirg‘iziston-O‘zbekiston” temiryo‘li Trans-Yevrosiyo transport yo‘lagi janubiy qismining tarmoqlaridan biriga aylanadi.

Kelishuvga muvofiq, rejalashtirilgan temiryo‘l “Qashg‘ar – Torugart – Makmal – Jalolobod – Andijon” yo‘nalishi bo‘ylab o‘tadi. Uning yillik yuk tashish hajmi 15 mln tonnaga yetishi, iste’molchilarga tovarlarni yetkazib berish muddati yetti kunga qisqarishi kutilmoqda.

Qirg‘iziston “Xitoy-Qirg‘iziston-O‘zbekiston” temiryo‘li qurilishi uchun Xitoy banklaridan kredit olish niyatidaligi ma’lum qilindi .

Eslatib o‘tamiz, mazkur loyihaning umumiy qiymati 4 milliard 700 million dollarga baholangan.

• Qirg‘iziston
• Xitoy