Bugun Yevropa Chempionlar Ligasi nimchorak finaliga o‘tish bahsi javob uchrashuvida “Real Madrid” o‘z uyida “Manchester Siti”ni qabul qiladi.

Manchesterda o‘tgan dastlabki o‘yindan farqli o‘laroq bugun jamoalar tarkibida bir qancha o‘zgarishlar bo‘lishi kutilmoqda. Xususan, birinchi bahsda himoyachilar bilan yuzaga kelgan jarohatlar bois bir qancha muammolarga duch kelgan “Real”ning jarohat olgan ikkala himoyachisi (Ryudiger va Alaba) ham safga qaytdi. Buning aksi o‘laroq “shaharliklar” javob o‘yin oldidan jiddiy yo‘qotishga uchradi. Jamoaning o‘ng qanot himoyachisi Akanji jiddiy jarohat olib Madriddagi o‘yinga borolmaydigan bo‘ldi. Ayni paytda “Man Siti” tarkibida ajoyib o‘yinlari bilan yaxshi taassurot qoldirayotgan o‘zbekistonlik himoyachi Abduqodir Husanovda o‘yinni asosiy tarkibda boshlash imkoniyati paydo bo‘lmoqda.

Bir qator sport nashrlari manchesterliklarning bugungi bahs uchun taxminiy tarkibini e’lon qilmoqda. Quyida Husanovni asosiyga “kiritgan” nashrlarning taxminlari bilan tanishamiz:

– Sportingnews. Abduqodir Husanov asosiy tarkibda maydonga tushadi.

“Manchester Siti” tarkibi (4-2-3-1, o‘ngdan chapga): Ederson (darvozabon) — Husanov, Dias, Ake, Gvardiol — Stouns, Niko — Savinyo, Foden, Marmush — Holand.

– Fansided. Husanov boshlang‘ich tarkibda maydonga tushishi mumkin.

“Manchester Siti”ning tarkibi: Ederson, Husanov, Dias, Stouns, Ake, Lyuis, Gvardiol, Savinyo, Foden, Holand, Marmush.

Eslatib o‘tamiz, “Real” va “Man Siti” o‘rtasidagi dastlabki uchrashuv Anchelotti shogirdlarining 2:3 hisobidagi g‘alabasi bilan yakunlangan edi. Javob bahsi 20-fevralga o‘tar kechasi Toshkent vaqti bilan soat 01:00 da start oladi.

• Abduqodir Husanov
• Chempionlar Ligasi
• Futbol
• Madrid
• Manchester Siti
• Real