O‘zbekiston milliy terma jamoasining Argentina bilan o‘tkazishi rejalashtirilgan o‘rtoqlik uchrashuvi bekor qilindi. Bunga Lionel Messining Argentina terma jamoasidagi faoliyatini yakunlash qarori sabab bo‘lgani xabar qilindi.

Dastlab Argentina terma jamoasi 21-sentyabrdan 6-oktyabrgacha davom etadigan FIFA kunlari doirasida Osiyo turini o‘tkazishi rejalashtirilgan edi. Ushbu tur doirasida Argentina 30-sentyabr kuni Xitoyda O‘zbekiston terma jamoasiga qarshi maydonga tushishi kerak edi.

Biroq Messi terma jamoadagi faoliyatini yakunlashga qaror qilganidan so‘ng Argentina futbol assotsiatsiyasi rejalarni o‘zgartirgan. Endilikda jamoa FIFA kunlaridagi uchrashuvlarini o‘z maydonida o‘tkazishi kutilmoqda.

“ESPN Argentina” ma’lumotlariga ko‘ra, Argentina sentyabr–oktyabr oylaridagi FIFA kunlari davomida ikki yoki uchta nazorat uchrashuvini o‘z maydonida o‘tkazishni rejalashtirmoqda. Bahslarning bir qismi Buenos-Ayresdagi “Monumental” stadionida, qolgan uchrashuvlar esa Kordovada o‘tkazilishi mumkin.

O‘zbekiston terma jamoasi esa navbatdagi FIFA kunlari doirasida Janubiy Koreya va Eron bilan o‘rtoqlik uchrashuvlarida ishtirok etishi rejalashtirilgan.