Ayni kunlarda Vengriyaning Budapesht shahrida yengil atletika boʻyicha Gran-pri turniri boʻlib oʻtmoqda. Unda dunyoning eng kuchli atletlari medallar uchun bahslarga kirishgan.

Eʼtiborlisi, yengil atletikaning balandlikka sakrash sektorida ayollar oʻrtasida oʻtgan bahslarda hamyurtimiz Safina Sadullayeva gʻalaba qozondi.

Mavzuga doir: Saʼdullayeva “Brilliant liga”da gʻalabaga teng natijaga erishdi

Budapesht Gran-prisida Safina oʻz chiqishini 1,90 metr bilan boshladi va ikkinchi urinishda ushbu balandlikni zabt etgan holda musobaqa gʻolibligini naqd qildi. Chunki bungacha qolgan ishtirokchilar oʻz chiqishlarini yakunlab boʻlishgan edi.

Tokio-2020 Olimpiadasi ishtirokchisi, V Islom birdamligi oʻyinlari chempioni boʻlgan Oʻzbekiston vakilasi oʻzining ikkinchi chiqishida 1,98 metr balandlikka buyurtma berdi. Agar ushbu balandlik ham zabt etilsa, Sadullayeva Oʻzbekiston rekordini yangilashga muvaffaq boʻlardi. Afsuski Safinaga bu safar biroz omad yetishmadi.

Budapesht Gran-prisida 2-oʻrinni Ukraina vakilasi Katerina Tabachnik egalladi. U 1,86 metr natija qayd etdi. 3-oʻringa esa musobaqa mezboni Barbara Sabo sazovor boʻldi, uning natijasi 1,83 metrni tashkil qildi.

• O‘zbekiston
• Safina Sadullayev
• Yengil atletika