Oddiygina idish yuvish vositasini ham qo‘lda tayyorlash mumkinligiga ishonasizmi? Bu vositalar ekologik nuqtai nazardan toza bo‘lishidan tashqari samarali tejashga yordam beradi ham. Yog‘ni yaxshi ketkazadi. Qo‘lbola idish yuvish vositasini tayyorlash uchun uning foyda va zararlarini ko‘rib chiqish kerak bo‘ladi. 

Ijobiy tomonlari
• Bunday vosita ekologik jihatdan toza va tashqi muhitga zarar yetkazmaydi. Idish yuzasida qolib ketmaydi, suv bilan oson yuviladi.
• Uning tarkibi zararli moddalardan xoli. Allergiya chaqirmaydi, terini ta’sirlantirmaydi. 
• Barcha kerakli narsalar arzon turadi. Ulardan aksariyatini istalgan oshxonadan topish mumkin. 

Salbiy tomonlari
• Qo‘lda yasalgan idish yuvish vositasi sotib olingan kimyoviy vositalarga qaraganda tez tugaydi. 
• Idish yuvish vositasini tayyorlash uchun ma’lum vaqt talab etiladi.  

Glitserin yoki xo‘jalik sovunidan tayyorlangan gel
Ushbu yuvish vositasini tayyorlash uchun 2 osh qoshiq qirg‘ichdan o‘tkazilgan xo‘jalik sovuni, 8 oshqoshiq glitserin, bir litr qaynagan suv va ikki osh qoshiq spirt kerak bo‘ladi. Aralashma suv hammomiga qo‘yiladi va quyuq massa hosil bo‘lguncha aralashtiriladi.

Tayyor bo‘lgach, shisha idishga solib bemalol foydalansa bo‘ladi.

Iste’mol sodasi asosidagi yuvuvchi vosita
Buning uchun sizga qirg‘ichdan o‘tkazilgan bir stakan bolalar sovuni, besh oshqoshiq iste’mol sodasi, bir stakan qaynagan suv, bir necha tomchi istalgan efir moyi kerak bo‘ladi.

Barcha masalliqlar blenderga solinib, yaxshilab aralashtiriladi. Quyuq massa hosil bo‘lgach, uni bemalol idish yuvish vositasi sifatida qo‘llash mumkin.

Idish yuvuvchi gel-pasta
Ikki oshqoshiq xo‘jalik sovuni, to‘rt oshqoshiq ammiak, uch oshqoshiq xantal kukuni, bir litr qaynagan suv kerak bo‘ladi. Aralashmalar ustiga uch oshqoshiq iste’mol sodasidan qo‘shsangiz ham bo‘laveradi. Avvaliga qaynagan suvga sovun solib eritib olinadi, keyin ammiak, xantal qo‘shiladi, 10 daqiqa tindirishga qo‘yiladi. Iste’mol sodasi qo‘shilib, yana bir bor aralashtiriladi. Aralashma 2 soatga tindirishga qo‘yiladi. Vaqt o‘tgach undan foydalanishni boshlash mumkin. 

Sprey shaklidagi yuvuvchi vosita
Bir stakan qaynagan suvga 3 foizli vodorod peroksidi va iste’mol sodasidan uch oshqoshiqdan qo‘shiladi. Masalliqlar yaxshilab aralashtiriladi va purkagichga solinadi. Mazkur vositani idish, plita, stol yuzasini tozalash uchun qo‘llash mumkin.