2-mart kuni Toshkent viloyati turizmni rivojlantirish departamenti tomonidan S. Azimov nomidagi “Fizika — Quyosh” ilmiy-ishlab chiqarish birlashmasi Materialshunoslik instituti, uning faoliyati bilan ommani yaqindan tanishtirish, butun Osiyoda yagona, noyob – “Katta quyosh qurilmasi” haqida ma’lumotlar berish maqsadida Toshkent viloyatining Parkent tumanida joylashgan Materialshunoslik institutida “Ochiq eshiklar kuni” o‘tkazildi.
Ushbu info-turda ommaviy axborot vositalari, turistik kompaniyalar, blogerlar va bir qancha ko‘ngilli yoshlar ishtirok etishdi. Tadbirda Materialshunoslik instituti, unda olib borilayotgan ilmiy tadqiqotlar, yaratilgan innovatsion ishlanmalar namoyish etildi.

Yangi innovatsiyalar haqida qisqacha...
Tadbir avvalida Materialshunoslik instituti rahbari Odiljon Parpiyev institutning asosiy qurilmasi, butun jahonda atigi ikki dona bo‘lgan (biri Fransiyada, biri O‘zbekistonda) “Katta quyosh qurilmasi” ekanligini alohida ta’kidlab o‘tdi. 
“Quyosh nurlaridan foydalanib, ushbu qurilma yordamida, sanoat uchun yangi materiallarni yaratish, o‘ta muhim ilmiy tadqiqotlar o‘tkazish maqsadida qo‘llanilib kelinmoqda. Mana shunday ishlanmalardan biri, turli ob-havo sharoitlariga chidamli, mustahkam tuzilishga ega keramik plyonka (qoplama)larning qishda isitish, yozda sovita olish xususiyatini yaratdik. Biz ularni issiqxonalar uchun foydalanmoqchimiz. Xususan, “Jizzah plastmassa” AJda issiqxonalar uchun maxsus mana shunday plyonkalar ishlab chiqarilmoqda. Ularni amaliyotda qo‘llash orqali sarflanuvchi energiya sarfini 60 foizgacha kamaytirish, hosildorlikni esa 30 foizga oshirish ko‘zda tutilgan”, deydi institut rahbari. 
Odiljon Parpiyev institut olimlari sa’y-harakatlari bilan metall qoplamalarning karroziyaga bardoshliligi 5 barobargacha oshiruvchi, lak-bo‘yoqni polimerlash texnologiyasi yaratilganligini alohida ta’kidlab o‘tdi. Ularni avtomobil, qurilish, elektr va boshqa maishiy sanoatda foydalanish mumkin.
Tadbirda Materialshunoslik instituti Rossiya aviatsion materiallar instituti bilan hamkorlikda kosmik kemalarning texnik himoya qobig‘ini sinovdan o‘tkazib kelinayotgani ma’lum qilindi.
Shuningdek, institutning katta-kichik ilmiy xodimlari, olimlari ishtirokida maishiy xo‘jalik uchun ovqat pishirish, suv qaynatuvchi quyosh qozonlari, suvni bug‘lash imkonini beruvchi qurilmalar namoyish qilindi. Ularning xususiyatlari haqida ma’lumotlar berildi.

Turizmni rivojlantirish yo‘lida...
Info-turda Toshkent viloyati hokimi birinchi o‘rinbosari Sayfiddin Nizamov tomonidan Parkent tumanining “Kumushkon qishlog‘i”da mahalliy-xorijiy sayyohlar uchun zaruriy infratuzilmalar yaratilayotgani, turistik obyektlar barpo etilganligi, qurilishi rejalashtirilgan 50 ta mehmon uylaridan hozirga qadar 20 tasi tashkil qilinganligi haqida ma’lum qildi. Sayfiddin Nizamov turizm bo‘yicha mana shunday obyektlarni barpo qilish orqali viloyatning chekka hududlarida yashovchi aholini ish bilan bandligini ta’minlash, yoshlarning tadbirkorlikka moyilligini oshirish, xorijiy sayyohlarga o‘zbek milliy urf-odatlarini tanishtirish ko‘zda tutilganlini aytib o‘tdi.