Ko‘pchilik film tomosha qilishni hordiq chiqarishning eng zo‘r yo‘li, deb biladi. Biroq bu oddiygina ko‘ngilochar mashg‘ulot emas. Kino miya hamda tanamizga to‘g‘ridan-to‘g‘ri ta’sir ko‘rsatadi. 
“Aksariyat filmlar o‘zi g‘oyalarini mantiqiy usul yordamida emas, hissiyotlar orqali yetkazishadi. Bu esa tabiiy instinktlarni pasaytirib, tuyg‘ularga qo‘shimcha bosim beradi va hislar yuzaga chiqishini ta’minlaydi, – deydi ruhshunos Birjit Vols. – Film tomosha qilish – hislaringiz eshiklarini ochib yuboradi, aslida bu eshiklar yopiq turgani yaxshi. Shu bois kinoga tushishdan avval asab hamda tanangiz buni qanday qabul qilishi haqida bir o‘ylab ko‘ring.

Komediya janridagi filmlar
Kulgi odamni turli muammolardan chalg‘itib, ish qobiliyatini yaxshilaydi. Organizmimizdagi quvonch gormoni – endorfin bizni qayg‘u va asabiylikdan xalos etadi. Bir qator tadqiqotlar natijasida kulgi immun tizimini yaxshilashi ma’lum bo‘ldi. Bu bizda virus va bakteriyalardan himoya qiluvchi hujayralar ishlab chiqarishni rag‘batlantiradi. Shuningdek, yallig‘lanishni davolaydigan va hatto saraton kasalligiga qarshi kurashadigan oq qon tanachalarini ko‘paytiradi. Yaqinda yapon olimlari kulgi allergiya xurujlarini kamaytirishda eng kuchli dori-darmonlardan kam emasligini isbotladilar. Tajriba davomida 30 nafar ayolga allergiya qo‘zg‘ovchi inyeksiya qilindi, shundan so‘ng ulardan bir qismiga komedik filmlar, ikkinchisiga esa dahshatli film qo‘yib berildi. Kulgili film tomosha qilganlarda allergiya alomatlari kamaydi, dahshatli film ko‘rganlar esa yanayam ko‘proq bezovtalangan.
Merilend Universiteti olimlari kulgi qon tomirlarini 22 foizga kengaytirishini ham aniqladilar. Bundan tashqari, kulgili filmlar tomosha qilganimizda qon bosimimiz kamayib, tomirlarda qon aylanishi ancha yaxshilanar ekan. Bir kunda 15 daqiqa mazza qilib kulsangiz, juda ko‘p kasalliklarga chap bergan bo‘lasiz. 
Kulgi qo‘rquvni yengishga ham yordam beradi. Agar siz samolyotda uchishdan qo‘rqsangiz, planshet yoki smartfoningizga sevimli komediya filmingizni yozdirib oling.  

Dahshatli filmlar
“Ujas” filmlarni yaxshi ko‘radiganlar orasida ekstremallar juda ko‘p uchraydi. Dahshatli filmni tomosha qilganda yurak tez-tez uradi, qon bosimi oshadi va odam ko‘p terlaydi. Mutaxassislarning ta’kidlashicha, sifatli dahshatli film tanaga muzli suvda tanani chiniqtirishdek foydali ta’sir ko‘rsatadi. Shu bois bu janr ishqibozlari kamroq kasal bo‘lib, uzoq umr ko‘rishadi. O‘rtacha miqdorda his qilingan qo‘rquv metabolizm va miya oziqlanishini yaxshilaydi va organizmning kasalliklarga qarshiligini kuchaytiradi.
– Biroq bunday filmlarning bir kamchiligi ham bor – ularni tomosha qilish o‘tmishdagi og‘riqli xotiralarni qo‘zg‘ashi mumkin, – deydi Nyu-Yorkdagi Rokfeller universiteti professori Bryus Makiven.

Romantik filmlar
Bunday filmlar stress gormonlari darajasi hamda qon bosimini pasaytirishi isbotlangan. Bundan tashqari, Michigan universiteti olimlari aniqlaganlaridek, romantik filmlar jinsiy istak, sevimli odamga yaqin bo‘lish quvonchi va boshqa yoqimli hislar uchun javobgar bo‘lgan progesteron gormoni ishlab chiqarishni ko‘paytiradi.
Olimlar o‘ziga xos tajriba o‘tkazib, ishtirokchilarga Meril Strip hamda Klint Istvud ishtirokidagi “Medison okrugi ko‘priklari” filmini qo‘yib berishdi. Va tomosha davomida tomoshabinlarda progesteron gormoni 10 foizga ko‘payganligi aniqlandi. 
Ko‘p bora o‘tkazilgan ilmiy tadqiqotlar shuni isbotladiki, qizg‘in romantik kino miyaga kuchli og‘riq qoldiruvchi vosita kabi ta’sir qiladi. Ya’ni, sevgi hissi uchun javob beradigan neyron tizimi va og‘riq hissi uchun javob beradigan neyron tizimlari o‘rtasida umumiylik mavjudligi aniqlandi.

Jangari filmlar
Biz ekrandagi tajovuzkor xatti-harakatlarni kuzatganimizda, uni xuddi hayotda sodir bo‘layotgandek his etar ekanmiz. Linfild kollejida olib borilgan tadqiqotlar, film umuman shafqatsiz bo‘lmasligi kerakligini yana bir bor ta’kidladi. 
Olimlar shu kabi videolarni tomosha qilgan 250 nafar kollej o‘quvchilarining xatti-harakatlarini o‘rganib chiqdi. Bir guruh qizlarga qonli qotillik ko‘rinishidagi rolik qo‘yib berildi. Ikkinchi guruh qizlarga esa g‘iybat ko‘rinishidagi sust tajovuz aks etgan kino ko‘rsatildi. Tadqiqot natijalari shuni ko‘rsatdiki, tajovuz hamda fitna aks etgan filmlar tomoshabinlarni atrofdagilarga dushmanlarcha munosabatda bo‘lishga undar ekan.