O‘zbekiston Respublikasi Vazirlar Mahkamasining “Mehnat sharoitlarni yaxshilash va mehnatni muhofaza qilish tizimini uzluksiz yanada takomillashtirish chora-tadbirlari to‘g‘risida”gi qarori loyihasi e’lon qilindi.

Unga ko‘ra, “Mehnatni muhofaza qilishni boshqarish tizimi to‘g‘risida”gi namunaviy Nizom - mehnatni muhofaza qilish tizimini boshqarishda va ta’minlashda ish beruvchilarga yordam berish maqsadida, O‘zbekiston Respublikasining amaldagi qonun hujjatlari va boshqa normativ-huquqiy hujjatlar asosida ishlab chiqilgan bo‘lib, barcha ish beruvchi tashkilotlar uchun majburiydir. 

Boshqaruv organlari ushbu Namunaviy nizom asosida o‘zlarining tarmoqlaridagi “Mehnatni muhofaza qilishni boshqarish tizimi to‘g‘risida”gi Nizomlarini ishlab chiqadilar va tasdiqlaydilar.

Shuningdek, agar mazkur Qaror muhokamadan o‘tib imzolansa, O‘zbekiston Respublikasi Bandlik va mehnat munosabatlari vazirligiga:

ikki hafta muddatda tashkilotlarda mehnatni muhofaza qilish tizimi tashkil etilmaganligi uchun javobgarlikni belgilash bo‘yicha O‘zbekiston Respublikasi Ma’muriy javobgarlik to‘g‘risidagi kodeksiga o‘zgartish va qo‘shimchalar kiritish bo‘yicha takliflar ishlab chiqish;

ishlab chiqarishda baxtsiz hodisalar va kasb kasalliklarining oldini olish bo‘yicha profilaktika ishlarini o‘tkazish, mehnatni muhofaza qilish qonunchiligini tadbiq etish va rioya kilish masalalari bo‘yicha hodimlar va ish beruvchilarga, shuningdek tadbirkorlik subyektlariga konsultativ va metodologik yordam ko‘rsatish;

mehnatni muhofaza qilishni boshqarish tizimi, shuningdek muayyan ish beruvchilarda mehnatni muhofaza qilish sohasida siyosatni, maqsadlarni va tartiblarni belgilash bo‘yicha kompleks choralarni amalga oshirish, xavfli va zarali ishlab chiqarish omillar va risklarning ta’sirini pasaytirish, shu asosda mehnat unumdorligini oshirilishini rag‘batlantirish bo‘yicha halqaro standartlar va xavfsizlik usullarini joriy qilish;

havfsizlik texnikasi va mehnat gigiyenasi qoidalarini amaliyotda tadbiq etilishini namoyishi bilan ish beruvchi va xodimlar uchun plakatlar, broshyuralar tayyorlash va tarqatish, videoroliklar, ma’ruzalar, muzokaralar va seminarlar, ko‘rgazmalarni tashkil etishni o‘z ichiga olgan mehnatni muhofaza qilish masalalari va mehnat huquqlarini himoya qilish bo‘yicha keng targ‘ibot ishlarini amalga oshirish vazifalari yuklatiladi.

Eslatib o‘tamiz, avvalroq Toshkent metropolitenining Yunusobod yo‘lidagi qurilishda sodir bo‘lgan baxtsiz hodisa haqida xabar bergan edik. Bu voqea texnika xavfsizligi qoidalariga rioya etilmaganligi va mehnat muhofazasiga oid talablarning to‘liq bajarilmaganligi bois aholi o‘rtasida mutasaddi tashkilotlarga nisbatan keskin fikrlarni uyg‘otgan edi.