Smartfon allaqachon bizning eng yaqin hamrohimizga aylanib ulgurdi. U orqali juda ko‘p ishlarimizni bitirishimiz mumkin. Ko‘pchilik uyali telefonda matn terishga qiynaladi. Quyidagi tavsiyalar bilan esa qisqa fursatda uyali telefonda tez yozishni o‘rganib olasiz.

Uzluksiz terish funksiyasini qo‘llang
Android tizimi foydalanuvchilari uzluksiz terish funksiyasini qo‘llab, matn terish tezligini sezilarli ravishda oshirishlari mumkin. Bu klaviaturadan qo‘lni olmay turib matn terish imkonini beradi. Ya’ni, probellar siz barmog‘ingizni olgan zahoti avtomatik ravishda qo‘yib boriladi.

iPhone’da ham bu usul amal qiladi. Faqat uni ishlatish uchun siz chetdan klaviatura o‘rnatishingiz kerak. 

Matn qisqartmalarini o‘rnating
Android, iOS dasturlarida oldindan belgilangan so‘z va iboralarni birgina qisqartmani terish orqali gap orasiga joylashtirish imkoni mavjud. Bu usul yordamida 2-3 ta simvol bilan butun boshli email-manzil, karta raqami va boshqa ma’lumotlarni osonlik bilan yozish mumkin.

Android tizimida bu qisqartirish quyidagi ketma-ketlikda amalga oshiriladi: “Sozlamalar” (“Nastroyki”) → “Yozuv va kiritish” (“Yazik i vvod”) → “Foydalaniladigan so‘zlar” (“Polzovatelskiy slovar”). Unga kirib, “Qo‘shish” tugmasi (“Dobavit”)ni bosasiz va ko‘p qo‘llaydigan so‘z va iboralar hamda ularning qisqartmasini kiritasiz.

iPhone’da esa bu analogik menyu “Sozlamalar” (“Nastroyki”) → “Asosiysi” (“Osnovniye”) → “Klaviatura” → “Matn almashtirish” (“Zamena teksta”) ketma-ketligida bajariladi. Qo‘shish uchun o‘ng burchakdagi “+”ni bosib, matn va uning qisqartmasini kiritasiz.

Bir qo‘lda terish funksiyasini yoqing
Ikki qo‘lda matn terish tezroq bo‘lsa ham smartfonda bu ishni amalga oshirish ancha qiyin. Bir qo‘lda telefonni ushlab turishning o‘zi noqulay. Shuning uchun ham bir qo‘lda matn terishga imkon beradigan, ekran burchagida harakatlanib turuvchi klaviatura o‘ylab topilgan. 

Android tizimida bu funksiyani qo‘llash uchun barmog‘ingizni nuqta-vergulga tekkizishingiz kerak. Ekranning chetidagi ko‘rsatkich klaviaturani ekranning boshqa tomoniga o‘tkazishga yordam bersa, “Qaytarish” (“Razvernut”) tugmasi oddiy rejimga qaytishga imkon beradi.
 
iOS tizimidagi telefonlarni bir qo‘lda terish rejimiga o‘tkazish esa globus rasmi tushirilgan tugmachani uzoq bosib turish orqali amalga oshiriladi. 

Boshqa klaviaturadan foydalaning
Anchadan buyon mobil telefonlarda chetdan klaviatura yuklab olish imkoni mavjud. Shu bois ularning har-xillarini sinab ko‘rish zarar qilmaydi. 
O‘z mahsulotiga ko‘proq auditoriyani jalb etish maqsadida ishlab chiqaruvchilar juda qiziq funksiyalarni o‘ylab topishgan. Masalan, qo‘lda yozish, sovg‘a yoki stikerlar joylashtirish va hokazo.

Aytib turib yozdirish usulidan foydalaning
Garchi qo‘l bilan terilmasa-da aytib turib yozdirilgan matnlar ham matn, shunday emasmi?! Ayrim hollarda hadeb klaviaturaga yopishavermasdan so‘zma-so‘z ayttirib yozdirgan ma’qul. Bunda smartfoningiz avtomatik ravishda matnni taniydi va sizga faqat “Yuborish” (“Otpravit”) tugmasini bosish qoladi, xolos. Android tizimidagi telefonlar uchun diktovka tugmasi – mikrofon tugmasini bosib turish orqali amalga oshiriladi.
iOS tizimidagilar ham diktovkaga xuddi shu tarzda ulanishlari mumkin. Birinchi marta ishlatayotganda sizga aynan shu funksiya tavsiya etiladi.