BMTning Oziq-ovqat va qishloq xo‘jaligi tashkiloti (FAO) ma’lumotiga ko‘ra, dunyoda oziq-ovqat mahsulotlari narxi ketma-ket uch oy davomida oshmoqda. Aprel oyida FAO oziq-ovqat narxlari indeksi 130,7 punktni tashkil etib, mart oyiga nisbatan 1,6 foizga, o‘tgan yilning shu davriga nisbatan esa 2 foizga yuqoriladi.

Narxlarning oshishiga ob-havo bilan bog‘liq xatarlar, energiya resurslari qimmatlashuvi va logistika tizimidagi uzilishlar asosiy sabab sifatida ko‘rsatilmoqda.

Jahon bozorida bug‘doy va makkajo‘xori narxlari ham o‘sdi. AQSH va Avstraliyadagi qurg‘oqchilik xavfi, Braziliyadagi ob-havo muammolari hamda o‘g‘it narxlarining oshishi bozordagi bosimni kuchaytirgan.

Shuningdek, o‘simlik moylari narxi 2022-yil iyulidan buyon eng yuqori darajaga yetdi. Palma, soya, kungaboqar va raps moylari qimmatlashgan. Bunga bioyoqilg‘i sanoatidagi talab ortishi va Janubi-Sharqiy Osiyoda ishlab chiqarish qisqarishi mumkinligi haqidagi xavotirlar sabab bo‘lmoqda.

Go‘sht narxlari ham rekord darajaga chiqdi. Ayniqsa, mol go‘shti narxi tarixiy maksimumni yangilagan. Sut mahsulotlari narxida esa biroz pasayish kuzatilgan.

Shakar narxi aksincha, bir oyda 4,7 foizga arzonlagan. Mutaxassislar bunga Xitoy, Tayland va Braziliyada ishlab chiqarish hajmi oshayotgani sabab bo‘layotganini ta’kidlamoqda.