Prezident Shavkat Mirziyoyev davlat xizmatlarini yanada soddalashtirish va byurokratiyani kamaytirish bo‘yicha taqdimot bilan tanishdi.

Ma’lum qilinishicha, bugungi kunda davlat xizmatlari soni 10 barobarga oshib, 61 milliondan ortgan. Ularning 80 foizi onlayn shaklda ko‘rsatilmoqda. Shunga qaramay, tizimda ortiqcha talab va qog‘ozbozlik hali ham saqlanib qolayotgani qayd etildi.

Yangi dasturga ko‘ra, 2030-yilgacha davlat organlari funksiyalarining 30 foizi qisqartiriladi, elektron xizmatlar ulushi esa 90 foizdan oshiriladi. 783 ta xizmatda “nol byurokratiya” tamoyili joriy qilinib, yuzlab xizmatlar to‘liq elektron shaklga o‘tkaziladi.

Shuningdek, xizmat muddatlari qisqaradi, ayrim to‘lovlar kamayadi va aholining milliardlab so‘m mablag‘i iqtisod qilinishi kutilmoqda.