O‘zbekistonda bank tizimi orqali amalga oshiriladigan yirik pul o‘tkazmalar bo‘yicha monitoring kuchaytirilmoqda. Adliya vazirligi tomonidan 8-may kuni Markaziy bank hamda Bosh prokuratura huzuridagi Iqtisodiy jinoyatlarga qarshi kurashish departamentining tegishli qarori ro‘yxatdan o‘tkazildi.

Yangi tartib FATF — jinoiy daromadlarni legallashtirishga qarshi xalqaro tavsiyalar asosida ishlab chiqilgan bo‘lib, yirik moliyaviy operatsiyalar ustidan nazoratni kuchaytirishni nazarda tutadi.

Yangi tartibga ko‘ra:

• 175 million so‘mdan yuqori operatsiyalar banklar tomonidan chuqur tekshiruvdan o‘tkaziladi
• Bank hisobisiz amalga oshiriladigan operatsiyalar uchun nazorat chegarasi 206 mln so‘mdan 175 mln so‘mga tushirildi
• 10,3 mln so‘m va undan yuqori ichki o‘tkazmalarda qo‘shimcha ma’lumotlar talab qilinadi (manzil, tug‘ilgan sana, STIR)

Shuningdek, 16 yoshgacha bo‘lgan shaxslar hisobvarag‘ida 16,48 mln so‘mdan ortiq mablag‘ harakati ikki ish kuni ichida shubhali operatsiya sifatida ko‘rib chiqilishi mumkin.

FATF “kuchaytirilgan monitoring” ro‘yxatidagi davlatlar bilan bog‘liq katta miqdordagi tranzaksiyalar ham shubhali operatsiyalar sifatida baholanadi.

Banklar shubhali operatsiya aniqlangan taqdirda 10 ish kuni ichida tekshiruv o‘tkazadi va mablag‘ manbaini tahlil qiladi.

Yangi tartib 9-avgustdan kuchga kiradi.