Голливуднинг таниқли актёри Киану Ривз "Матрица" франшизасининг илк фильми учун олинган даромаддан 70 фоизини лейкемия касаллигига қарши курашиш фондига хайрия қилди. Актёр франшизанинг илк фильмида суратга тушгани эвазига 10 миллион АҚШ доллари миқдорида ҳақ олган, кейинчалик кинотеатрлардаги намойишдан тушган даромаднинг 10 фоизи – 35 миллион доллар миқдоридаги маблағни қўлга киритган. Умумий ҳисобда 45 миллион долларнинг 70 фоизи лейкемияга қарши курашиш фонди ҳисоб рақамига ўтказиб берилган.

Гап шундаки, 1991 йилда актёрнинг кичик синглиси Ким Ривзда лейкемия касаллиги аниқланган. Ана шу вақтларда актёр хаста синглисига ғамхўрлик қилишни ўз бўйнига олган. Ижодкор синглисига яқинроқ бўлиш учун ўз уйини сотиб юборган, унинг касалликдан бутунлай тузалиб кетиши учун 5 миллион АҚШ доллари миқдорида маблағ сарфлаган.

"У ҳар доим мен учун ғамхўрлик қиларди. Мен ҳам унга бутун умр ғамхўрлик қиламан", деган эди Киану ўша вақтларда.

2001 йилда Ким Ривздаги касаллик ремиссия даврига ўтган. Айни вақтда актёрнинг синглиси 55 ёшда. Киану Ривзнинг ўзи эса 2000 йиллар бошида саратонга қарши курашиш фондини ташкил қилган. Аммо, ташкилот номини очиқламаслик қарорига келган.

Маълум бўлишича, Киану франшизанинг қолган иккита фильмидан олган даромадини визуал эффектлар билан ишлаган гуруҳ аъзолари, шунингдек либослар устида ишлаган дизайнерлар билан бўлишган.

• Кино
• Маданият
• Санъат
• машҳурлар
• қизиқарли