Ўзбекистонда жисмоний шахсларни маиший газ баллонлари билан таъминлаш хизмати 2026 йил 1 июндан бошлаб фақат Давлат хизматлари марказлари ёки Ягона интерактив давлат хизматлари портали орқали амалга оширилади. Бу ҳақда ҳукумат қарорида белгилаб қўйилган.

Ушбу тартиб аҳолига қулайлик яратиш ва хизматларни рақамлаштиришни кенгайтиришга қаратилган.

Маиший газ баллонлари табиий газ тармоғига уланмаган ҳудудларда яшовчи аҳолига берилади. Ариза бериш жараёни “E-gaz” тизими орқали амалга оширилади. Текширувлардан сўнг ижобий хулоса берилса, 12 иш куни ичида 1 дона газ баллони бепул етказиб берилади.

“Ҳудудгазтаъминот” АЖ маълумотига кўра, тизимни Ягона портал ва Давлат хизматлари марказлари билан интеграция қилиш ишлари олиб борилмоқда.

Бугунги кунда мамлакатда 4,5 миллиондан ортиқ истеъмолчи табиий газ, 3,7 миллиондан зиёди эса суюлтирилган газ билан таъминланмоқда.