Миллиардер Алишер Усмоновнинг USM ҳолдинги “Капиталбанк” акцияларини сотди. Бу ҳақда банк матбуот хизмати хабар берди.

Қайд этилишича, “Капиталбанк” акцияларининг 61,54 фоизига биргаликда эгалик қилувчи “Телекоминвест” МЧЖ (РФ) ва “FINANCE TCI” МЧЖ (Ўзбекистон) устав капиталидаги 100 фоиз улушини сотиш бўйича битим тузди.

Унга кўра, битим “Капиталбанк” бизнесини биргаликда ривожлантиришдан манфаатдор бўлган хусусий инвесторлар гуруҳи ташаббуси билан тузилган. Бироқ, битимнинг тижорат шартлари ошкор этилмаган.

“Капиталбанк”нинг йирик миқдордаги акцияларига эгалик қилувчи компаниялар Алишер Усмоновга қарашли ҳисобланади. Россиялик миллиардер 2021 йилнинг ноябр ойидан бери “Капиталбанк”даги улушини ошириб келаётганди.

Маълумот ўрнида, 2021 йил 29 октябр куни Ойбек Ботирович Турсунов “Капиталбанк” акциядорлик тижорат банки устав капиталидаги 34,10 фоиз акцияни сотиб олганди. Шу билан банкдаги у эгалик қиладиган жами акциялар 50 фоизга етган. Фонд биржаси сайтида харид нархи бўйича маълумотлар келтирилмаган.

Битимдан сўнг банкда Ойбек Турсунов эгалик қиладиган акциялар сони 164 миллион 927 890 тага етганди.

• Акция
• Алишер Усмонов
• Капиталбанк