Ўзбекистонда хорижда ишлаш истагидаги фуқаролар учун мавжуд бўш иш ўринлари, касбий талаблар ва тил билиш шартлари ҳақидаги маълумотлар ҳар бир маҳаллагача етказилади. Президент Шавкат Мирзиёев меҳнат миграциясига бағишланган йиғилишда ушбу тизимни йўлга қўйиш бўйича топшириқлар берди.

Давлат раҳбари ҳар бир хорижий иш берувчининг буюртмаси бўйича қайси давлатда қандай мутахассисларга талаб борлиги, уларни қаерда ўқитиш ва қайси тилни билиши зарурлигини аниқ кўрсатиб бериш вазифасини қўйди.

Янги тартибга кўра, «маҳалла еттилиги» хорижда ишлаш истагидаги фуқароларга мавжуд имкониятларни тушунтиради ва номзодларни «Онлайн маҳалла» платформасига киритади. Ҳокимликлар ҳамда масъул ташкилотлар эса уларни касб ва тилга мақсадли тайёрлаш, кейинчалик ишга жойлаштириш учун жавобгар бўлади.

Тизим фаолияти устидан назорат ҳам кучайтирилади. Вилоят ҳокимлари ҳар ойда бир марта, туман ҳокимлари эса ойига икки марта миграция масъуллари ва «маҳалла еттилиги» иштирокида амалга оширилган ишларни муҳокама қилади. Ҳар бир номзоднинг тайёргарлиги ва ишга жойлашиши алоҳида назоратга олинади.

Йиғилишда юқори даромадли хорижий иш ўринларини яратиш учун иш берувчилар билан келишувларнинг ўзи етарли эмаслиги ҳам таъкидланди. Бунинг учун ривожланган давлатлар билан иқтисодий дипломатияни кучайтириш, иш квоталари, меҳнат визалари ва малакани тан олиш масалаларини изчил ҳал этиш зарурлиги қайд этилди.