Олмалиқ комбинати мис ишлаб чиқариш бўйича дунёдаги учта энг йирик комплексдан бирига айланади. Бу ҳақда 16 март куни Шавкат Мирзиёев Олмалиқ конь-металлургия комбинатида 3-мис бойитиш фабрикасини ишга тушириш маросимида маълум қилди. Маълум қилинишича, 3-мис бойитиш фабрикаси тўлиқ ишга тушганидан кейин Олмалиқ комбинатида мис концентратининг кунлик ҳажми ҳозирги 2 минг 400 тоннадан 5 минг тоннага ошади. Бундан ташқари, қиймати 2,5 миллиард долларлик янги мис эритиш заводини барпо этиш бўйича ишлар бошлаб юборилгани эълон қилинди.

Мазкур икки йирик қувватлар ҳисобига мис катоди ишлаб чиқаришнинг йиллик ҳажми 300 минг тоннага, олтин 33 тоннага, кумуш 203 тоннага, молибден 1,7 минг тоннага етади. Шу билан бирга, уран қазиб олиш ва кимё саноати учун зарур хомашё бўлган сульфат кислотаси ишлаб чиқариш 3 карра ошади. Бу йилига комбинатга қўшимча 5 миллиард доллар тушум дегани.

Президент комбинат бўйича ҳали режалар катта эканини таъкидлаб, юқорида айтилган кўрсаткичларни яна 1,5 карра оширишга хизмат қиладиган 4-мис бойитиш фабрикаси бўйича лойиҳаолди ишлари кетаётганини қайд этди. Ушбу янги лойиҳалар ишга тушганида Олмалиқ комбинати мис ишлаб чиқариш бўйича дунёдаги учта энг йирик комплексдан бирига айланади. Шунингдек, Ўзбекистон 2030 йилга қадар ишлаб чиқаришни олтинда 175 тоннага, кумушда 500 тоннага, уранда 15 минг тоннага, мисда 500 минг тоннага етказишни мақсад қилган. Бу борада амалга оширилаётган 22 миллиард долларлик лойиҳалар доирасида яратиладиган 40 мингга яқин юқори даромадли иш ўринлари ёшлар учун катта имконият бўлади.

“Ҳозир республика фаолларига мурожаат қилмоқчиман. Ёшларга етказинглар: ўқисин, излансин, бундай корхоналарда ишлаб, ҳаётда муносиб ўрнини топсин”, – деди президент.

Ишга туширилаётган 3-мис бойитиш фабрикаси Янги Ўзбекистоннинг тоғ-конь ва металлургия саноатини янги технологик босқичга олиб чиқишга хизмат қилишига ишонч билдирилди.

• Metallurgiya
• Президент
• konchilik
• sanoat
• tadbir