Туркиянинг Измир шаҳрида Ўзбекистон фуқароси билан боғлиқ ҳодиса юз берди. Бу ҳақда Ўзбекистон Республикасининг Истанбул шаҳридаги Бош консулхонаси расмий маълумот берди.

Дастлабки маълумотларга кўра, Наманган вилоятидан бўлган 22 ёшли фуқаро Севдора Ҳакимжонова Измир шаҳрида яшаб келаётган вақтида кўп қаватли турар-жой биносининг тўртинчи қаватидан тушиб кетган. Ҳозирда у давлат шифохонасида даволанмоқда. Шифокорларнинг билдиришича, аёлнинг аҳволи оғир.

Маълум қилинишича, С.Ҳакимжонова Туркия фуқароси билан имом никоҳи асосида турмуш қурган, бироқ никоҳ расмий тартибда қайд этилмаган. Маълумотларга кўра, никоҳ маросими Чуст туманида ўтказилган.

Кейинчалик эр-хотин Туркиянинг Измир шаҳрига кетиб, куёвнинг яқин қариндошлари билан бир хонадонда яшаб келган. Қайд этилишича, турмуш ўртоғи ҳам Ҳакимжонова каби эшитиш ва нутқида нуқсони бўлган шахс ҳисобланади.

Мазкур ҳолат юзасидан Туркия ҳуқуқни муҳофаза қилувчи органлари томонидан жиноий иш қўзғатилган. Ҳозирда воқеанинг барча тафсилотларини аниқлаш мақсадида тергов ҳаракатлари олиб борилмоқда, тўпланган материаллар прокуратура органлари томонидан кўриб чиқилади.

Дипломатик ваколатхона маълум қилишича, вазият консулхона назоратига олинган. Фуқаронинг соғлиғи ҳолати ҳамда тергов жараёнлари бўйича Туркия ваколатли идоралари билан ҳамкорликда иш олиб борилмоқда.

• Halokat
• Konsullik
• Ўзбекистонлик
• Туркия
• fuqaro