АҚШ пойтахти округи апелляция суди журналист Жамол Қошиқчининг ўлдирилиши бўйича Саудия Арабистони валиаҳд шаҳзодаси Муҳаммад бин Салмон Ол Саудга қарши киритилган даъвони рад этди. Судя Жон Бейтс шаҳзода “суверен дахлсизлик” ҳуқуқига эга эканлиги ва шунинг учун журналистнинг оила аъзолари томонидан унга қарши берилган даъво рад этилишини маълум қилди.

Бейтснинг таъкидлашича, яқинда президент Жо Байден маъмурияти томонидан Саудия шаҳзодасига иммунитет бериш бўйича кўрсатилган тавсия сабаб бу ишда унинг қўлидан ҳеч нарса келмайди.

Ушбу фуқаровий даъвони рад этиш тўғрисидаги қарор Саудия Арабистони тахти вориси энди АҚШга эркин киришини англатади. Бу шаҳзоданинг ўзи каби жиноятда айбланган бир қанча шерикларига ҳам тегишли.

Тhe Guardian нашрининг таъкидлашича, агар иш ёпилмаганида ёки ундан ҳам баттарроқ, яъни шаҳзода Қошиқчи ўлдирилишини уюштирганликда айбдор деб топилса, бу АҚШнинг молиявий манфаатларини хавф остига қўйган бўларди. Вашингтон эса бунга йўл қўя олмади.

Қошиқчининг ўлдирилиши

Ар-Риёд сиёсатига оид танқидий мақолалари билан танилган Жамол Қошиқчи 2017 йилдан бери АҚШда яшаган ва у ерда Тhe Washingtong Post газетаси билан ҳамкорлик қилган. У 2018 йил 2 октябрь куни Саудия Арабистонининг Истанбулдаги Бош консуллигига ташриф буюрганидан сўнг ғойиб бўлган. Ўша йилнинг 20 октябрида Саудия Арабистони расмийлари можаро натижасида журналист дипломатик миссия биносида ўлдирилгани ҳақида хабар берган эди.

2021 йил февраль ойида АҚШ Миллий разведка директори идораси Қошиқчининг ўлдирилиши ҳақидаги ҳисоботни эълон қилди. Америка томонига кўра, Саудия валиаҳд шаҳзодаси операцияни шахсан маъқуллаган, чунки у журналистни таҳдид сифатида кўрган.

АҚШ маъмурияти хориждаги диссидентларга таҳдид қилган ва Қошиқчи қотиллиги ишида иштирок этган қиролликнинг 76 субъэктига қарши виза санкцияларини эълон қилди. Ар-Риёдда эса Вашингтоннинг ушбу хулосалари қатъиян рад этилди.

• АҚШ
• Muhammad bin Salmon
• Олий суд
• Саудия Арабистони