АҚШ армияси жисмоний тайёргарлик ва ташқи кўринишга қўйиладиган талабларни кучайтиради. Америка қўшинлари гендерга боғлиқ бўлмаган қатъийроқ стандартларга бўйсунади.

Бу ҳақда Пентагон раҳбари Пит Хегсет маълум қилди.

АҚШ армияси ҳарбий хизматчилар учун бўй ва вазн талабларини жорий қилади. Жисмоний тайёргарлик тестлари йилига икки марта ўтказилади. “Биз йога ёки мушакларни қизитиш ҳақида гапирмаяпмиз”, – деган Мудофаа вазири.

Хегсетнинг айтишича, у парадда ортиқча вазнли аскарларни кўришдан чарчаган. “Пентагон коридорларида ортиқча вазнли генераллар ва адмиралларни кўриш ҳам худди шундай қабул қилиниши мумкин эмас”, – деб давом этган у.

Ҳарбий хизматдаги эркакларга соқол ва узун соч қўйиш ҳам тақиқланади (Махсус кучлар бундан мустасно).

Мудофаа вазири, шунингдек, янги қоидалар АҚШ армиясидаги аёллар сонига таъсир қилиши мумкинлигини айтиб ўтган. Пит Хегсетнинг таъкидига кўра, Пентагон талабларни аёл ходимларини атайлаб қисқартириш мақсадида жорий қилмаяпти.

• АҚШ
• Ҳарбий хизматчилар