Ўзбекистон ҳукумати 16 март куни Эрон халқига инсонпарварлик ёрдами юборди. Бу ҳақда Ташқи ишлар вазирлиги матбуот хизмати хабар берди.

Маълум қилинишича, ёрдам таркибига озиқ-овқат маҳсулотлари, жумладан ун, гуруч, шакар, макарон маҳсулотлари, кунгабоқар ёғи ҳамда консервалар киритилган. Шунингдек, инсонпарварлик юкида дори воситалари ва тиббий буюмлар ҳам мавжуд.

Инсонпарварлик юки Эрон томонига етказилган бўлиб, уни қабул қилиб олиш маросимида Дарегаз шаҳри ҳокими Мужтаба Базмара, Эрон Ташқи ишлар вазирлигининг Хуросон Разавий вилоятидаги идораси раҳбари — вазир маслаҳатчиси Али Масумифар ҳамда Эроннинг Туркманистондаги элчиси Али Можтаба Рузбехани иштирок этди.

Тадбир давомида Эрон расмийлари халққа кўрсатилган инсонпарварлик ёрдами учун Ўзбекистон президенти номига миннатдорлик билдирди. Уларнинг таъкидлашича, мазкур ташаббус икки мамлакат ўртасидаги дўстлик, ҳамжиҳатлик ва ўзаро қўллаб-қувватлаш анъаналарининг ёрқин ифодаси ҳисобланади.

• Eron
• Гуманитар ёрдам
• Ўзбекистон