Wилдберриэс омборларига дрон ҳужумлари ўзбекистонлик сотувчиларга ҳам зарар етказаётгани айтилмоқда

Россиянинг Wилдберриэс компанияси асосчиси Татяна Ким Екатеринбургдаги логистика марказига Украина томонидан 200 дан ортиқ дрон ҳужуми уюштирилганини маълум қилди. Бироқ Россия расмийлари ва Мудофаа вазирлиги бу ҳудудда бундай кўламдаги ҳужум юз бергани ҳақида ахборот бермаган.

Компания маълумотига кўра, логистика марказларига уюштирилаётган ҳужумлар нафақат россиялик, балки Ўзбекистон, Қирғизистон, Беларус, Қозоғистон, Арманистон ва Хитойдаги ўн минглаб сотувчиларга ҳам миллиардлаб зарар етказмоқда. Сўнгги вақтларда Москва вилояти, Ленинград, Тамбов, Волгоград, Краснодар ва бошқа ҳудудлардаги омборлар ҳам зарбаларга учрагани айтилган.

Хусусан, 25-июль куни Екатеринбургдаги логистика маркази бўйича компания ва Россия расмийлари берган маълумотлар бир-бирига мос келмади.

Wилдберриэс баёнотида омборга 200 дан ортиқ самолёт туридаги дрон ҳужум қилгани, натижада автотураргоҳдаги автомобиллар ёниб кетгани қайд этилган. Компания бу ҳолатни форс-мажор деб баҳолаб, сотувчиларга етказилган зарарни тўлиқ қоплаш мажбурияти йўқлигини, бироқ қўллаб-қувватловчи тўловлар амалга оширилаётганини билдирган.

Россия Мудофаа вазирлиги ва Свердловск вилояти расмийлари эса фақат битта дрон уриб туширилгани, унинг парчалари тушиши оқибатида 300 квадрат метр майдонда ёнғин юзага келганини маълум қилган. Вазирликнинг ўша кунги ҳисоботларида Свердловск вилояти умуман тилга олинмаган.

Агар Wилдберриэс келтирган рақамлар тасдиқланса, ўша куни Россия бўйлаб учирилган дронларнинг деярли ярми айнан ушбу логистика марказига йўналтирилган бўлади. Ҳозирча компания тилга олган 200 дан ортиқ дрон ҳақидаги маълумот расман тасдиқланмаган.