Қирғизистон Миллий хавфсизлик давлат қўмитаси Ўзбекистон билан чегарада яна бир яширин туннелни аниқлади. Унинг чуқурлиги 13 метр, узунлиги 170 метрга яқин

Бу бир ой ичида икки давлат чегарасида аниқланган учинчи яширин ер ости йўли ҳисобланади. Бу сафар туннелга тушиш йўли Қорасув шаҳрида жойлашган хонадонларнинг бирида жойлашган.

Хабарда айтилишича, хонадон эгаси қирғизистонлик М.И. ўтган йилнинг сентябр ойида Рустам исмли шахс билан икки давлат чегараси ўртасида яширин ер ости йўли қуришга келишган.

Улар туннел орқали Қирғизистондан Ўзбекистонга валюта ва турли маҳсулотларни олиб ўтишни режалаштирганлар.

Фуқаро М.И. ўз айбига иқрор бўлган ва мазкур ҳолат бўйича олиб борилаётган тергов ишларида орган ходимларига яқиндан кўмак беришга тайёрлигини билдирган.

Ҳозирда ҳолат юзасидан мамлакат Миллий хавфсизлик давлат қўмитаси томонидан тергов-суриштирув ишлари олиб борилмоқда.

Эслатиб ўтамиз, аввалроқ Қирғизистон ва Ўзбекистон чегарасида 270 метрли ҳамда 155 метрли ер ости туннеллари топилгани хабар қилинган эди.

• Чегара
• Ўзбекистон
• Қирғизистон
• туннель