Зеленский хавфсизлик органлари, ҳарбийлар ва ҳуқуқ-тартибот идоралари ходимлари иштирокида бўлиб ўтган конференция якунида тегишли фикрни билдирди:

“Ускуналар, ўқ-дорилар, янги шартномалар ва таъминот географияси келгани ҳақида хабарлар олдим. Фронтдаги маълумотларни эшитдим. Купянск, Авдеевкада оғир жанглар кечмоқда, аммо бизнинг аскарлар ўз позицияларини ушлаб турмоқда”, — деди у.

Зеленский Россия ҳозир қўл етиши мумкин барча нарсани йўқ қилишга уринаётганини айтди. Хусусан, ҳозирда украиналик қутқарувчилар ва бошқа хизматчилар Херсондаги Берислав ва Харковдаги Борова ўққа тутилиши оқибатларини бартараф этмоқда.

“Биз энергетика инфратузилмасига террористик ҳужумларга тайёрланяпмиз. Бу йил нафақат ўзимизни ҳимоя қиламиз, балки жавоб қайтарамиз. Душман буни яхши билади. Биринчидан, улар флотни Қримдан олиб чиқиб кетди, энди эса самолётларини чегарадан узоқроққа кўчирмоқда”, — дея қўшимча қилди Зеленский.

• Россия
• Украина
• Зеленский