Британиянинг Тилбери шаҳридаги “Amazon” омборида ишлайдиган юзлаб ишчилар иш ҳақининг пастлигидан норозилик билдириш учун ўз ишларини ташлаб кетишди. Бу ҳақда GMB касаба уюшмаси маълум қилди. Ходимлар иш берувчи компаиҳнияни мамлакатда яшаш нархининг ошиши фонида иш ҳақини етарли даражада оширмаётгани учун танқид қилишган.

“Amazon” кўплаб мамлакатлардаги ишчиларнинг ойлик маоши ва иш шароитлари ҳақида шикоятларига дуч келди. GMB вакиллари компания касаба уюшмалари билан ҳамкорлик қилишдан бош тортишда давом этаётганини таъкидлади. Қайд этилишича, “Amazon” қисқа муддатли шартномалардан қайта фойдаланади.

“Бу эса ишчиларнинг ҳуқуқларини бузади”, – дейди касаба уюшмаси расмийлари.

GMB маълумотларига кўра, 3 ва 4 август кунлари 800 нафар омбор ишчиси компанияни тарк этган. Ходимлар “Amazon”ни иш ҳақи соатига қўшимча 35 пенсга оширилмагани учун танқид қилишган. Касаба уюшмалари эса бу миқдор 2 фунт стерлингга ошиши кераклигини талаб қилмоқда.

“Amazon”нинг Буюк Британияда 70 000 дан ортиқ ходими бор. Компания вакилларининг таъкидлашича, омбор ишчиларининг бошланғич маоши соатига 10,50 фунт стерлингдан 11,45 фунт стерлинггача оширилиши режалаштирилган.

Буюк Британия бўйлаб ишчилар, жумладан, темир йўллар, авиакомпаниялар ва телекоммуникация соҳаси ходимлари сўнгги ойларда иш ташлашга чиқдилар, чунки иш ҳақи товар нархининг ошиши билан баробар эмас.

Ўтган ой ўрталарида “Amazon” 2022 йил охиригача Буюк Британияда 4000 та иш ўрни яратишни режалаштираётганини эълон қилган эди. Шунда компаниянинг мамлакатдаги умумий ходимлари сони 75 минг кишига етади, деб хабар беради BBC.

Бунга қадар “Amazon” 2021 йил давомида Буюк Британияда 25 000 янги иш ўрни яратган ва тўртта янги омбор очган.

• Amazon
• Буюк Британия
• Иш стажи