АҚШ Президенти Дональд Трамп мамлакатда «сунъий интеллект» (СИ) атамасидан воз кечиб, уни «супер интеллект» деб аташни маълум қилди. У бошқа давлатларни ҳам мазкур таърифга эргашишга чақирди. Бу ҳақда у 22 сентябрь куни БМТ Бош Ассамблеясидаги нутқида сўз очди.

«Шу дақиқадан бошлаб АҚШнинг барча ҳужжатларида ва умид қиламанки, бутун дунёда «сунъий интеллект» ўрнига анча аниқроқ бўлган «супер интеллект» атамаси қўлланилади», — деди Дональд Трамп.

АҚШ етакчининг тушунтиришича, янги атама қулоққа анча яхшироқ эшитилади. У «сунъий» сўзи технология ҳақида гўёки «сохта ва аслидагидек эмас» деган нотўғри таассурот уйғотишини таъкидлади.

Асоссиз қўрқувлар ва назорат

Трамп ўз чиқишида сунъий интеллект келтириб чиқарадиган таҳдидлар ҳақидаги огоҳлантиришларни кескин рад этиб, уларни уйдирма деб атади. Унинг фикрича, авваллари иқлим ўзгариши сабабли инсониятнинг муқаррар ҳалокати ҳақида бонг урганлар бугун жамоатчиликни «роботлар инсониятга ҳужум қилади» деб қўрқитмоқда.

Шу билан бирга, АҚШ технологиялар тараққиётини диққат билан кузатиб боришини таъкидлаган Президент зарурият туғилса, Адлия вазирлиги ва ҳуқуқни муҳофаза қилиш органлари вазиятни назорат остига олишга тайёрлигини эслатиб ўтди.

«Мен саноат инқилобидан ҳам улканроқ миқёсдаги бу ҳодисанинг ривожланишини жиловламоқчи эмасман», — деди Америка етакчиси соҳага яшил чироқ ёқишини билдириб.

Технологик пойга ва хавотирлар

Сўнгги ҳафталарда АҚШда СИ соҳасидаги ишланмаларни бироз секинлаштириб, технологиянинг инсоният учун хавфсизлигига тўла амин бўлиш ғояси қизғин муҳокама қилинмоқда. Хусусан, мамлакатдаги йирик технологик компания раҳбарлари шундай эҳтиёткорона чораларни қўллаб-қувватлашмоқда.

Маълумот учун, аввалроқ Американинг Anthropic компаниясининг СИ хавфсизлиги бўйича мутахассиси Эван Хюбингер сунъий интеллект яқин ўн йил ичида цивилизациямизни йўқ қилиб юбориш эҳтимоли 10 фоизни ташкил этишини тахмин қилган эди.