Непалда Гома исмли урғочи йўлбарс бир вақтнинг ўзида бешта болага — ўзининг иккита ва бошқа урғочи йўлбарснинг учта боласига қараб тургани билан эътибор қозонди. Бу ҳақда BBC’нинг “Tiger Island” ҳужжатли лойиҳаси муаллифлари маълум қилди.

Ғайриоддий ҳолат мамлакат ғарбидаги Бардиа миллий боғи яқинида жойлашган жамоат ўрмонида фототузоқлар ёрдамида қайд этилган. Гома бешта йўлбарс боласи билан қолган пайтда, Жугини исмли бошқа урғочи йўлбарс озиқланаётган бўлган.

BBC жамоаси кузатувни ёввойи табиатда урғочи йўлбарснинг бошқа йўлбарс болаларига ғамхўрлик қилиши мумкинлигининг ўзига хос намунаси сифатида баҳолаган. Ҳайвонларни бир-биридан фарқлашда уларнинг танасидаги чизиқлар нақшидан фойдаланилган.

Тадқиқотчилар Гома ва Жугини ўртасида қариндошлик алоқаси бўлиши мумкинлигини ҳам тахмин қилмоқда. Жумладан, Гома Жугинининг онаси бўлиши эҳтимоли бор. Бироқ бу тахмин ҳозирча генетик текширувлар орқали тасдиқланмаган.

Йўлбарслар, одатда, ов қилиш ва ҳудуддан фойдаланишда якка ҳаёт кечиради. Мутахассисларнинг таъкидлашича, бу кузатув урғочи йўлбарслар айрим шароитларда бошқа йўлбарсларнинг болаларига ҳам қараши мумкинлигини кўрсатади. Бундай хатти-ҳаракат қанчалик кам учраши ёки бу бир марталик ҳолат эканини аниқлаш учун қўшимча кузатувлар зарур.